लहानमा किसानद्वारा खुट्टी खोला सिंचाई नहर संरक्षणका लागि विरोध र्‍याली

फिरोज सिद्दिकी

लहान । किसानहरूले खुट्टी खोला सिंचाई नहरलाई ढलका रूपमा प्रयोग गर्ने लहान नगरपालिकाको कार्यको विरोध गर्दै आज लहानमा एक विशाल र्‍याली निकालेका छन्।

खुट्टीखोला नहर सिंचाई संघर्ष समितिको अगुवाइमा आयोजित र्‍यालीले “नहरलाई ढल बनाउन पाइदैन”, “किसान विरोधी मेयर चाहिदैन” र “किसानको माग पुरा गर” जस्ता नाराका साथ विरोध र्‍याली निकालेका हुन्।

र्‍यालीको सुरूवात लहानस्थित पशुपति आदर्श माध्यमिक विद्यालयको प्राङ्गणबाट भएको थियो, जहाँ सयौं किसानहरूको उत्साहपूणर् सहभागिता देखिएको थियो।

नगरका विभिन्न भागको परिक्रमा गर्दै र्‍याली शहिद चौकमा पुगेपछि कोण सभामा परिणत भएको थियो। र्‍यालीमा सहभागी किसानहरूले नहरलाई सिंचाईका लागि मात्र प्रयोग गर्नुपर्ने र कृषि क्षेत्रमा नहरको आवश्यकतालाई ध्यानमा राख्नुपर्ने बताएका छन्।

खुट्टी खोला सिंचाई संघर्ष समितिका अध्यक्ष धर्मराज चौधरीले किसानहरूको मागलाई बेवास्ता गर्दै नहरलाई ढलमा परिणत गर्न खोजिएकोमा गम्भीर असन्तोष व्यक्त गर्दै उनले यो निणर्य किसानको हितविपरीत रहेको र नगरपालिकाले आफ्नो योजनालाई फिर्ता लिनुपर्ने बताए।

अध्यक्ष चौधरीले किसानहरूका लागि सिँचाइ प्रमुख मुद्दा भएको भन्दै यसविरुद्ध अझ सशक्त संघर्ष गर्ने चेतावनी दिएका छन्।

सहभागी किसानहरूले “जय जवान, जय किसान”को नारा लगाउँदै नहरलाई सिंचाईका लागि सुरक्षित राख्न नगरपालिकालाई दबाब दिएका छन्। उनीहरूले नहरलाई ढल निर्माणको लागि प्रयोग गर्दा किसानहरूको कृषि उत्पादनमा नकारात्मक असर पर्ने बताउँदै, सिंचाई सुविधालाई संरक्षण गर्नका लागि निरन्तर संघर्ष जारी राख्ने चेतावनी समेत दिएका छन्।