राष्ट्रिय स्वतन्त्र पार्टी, लहानको विरोध, भेदभाव नगर्न लहान नगरपालिकालाई चेतावनी

फिरोज सिद्दिकी 

लहान । स्वतन्त्र पार्टी, लहान नगर समितिले लहान नगरपालिका द्वारा खुटीखोला सिँचाइ नहर र सो नहरमा निर्माणधिन योजनाको विषयमा आयोजित सर्वदलीय बैठकमा आमन्त्रण नगरिएकोप्रति कडा असन्तुष्टि व्यक्त गरेको छ। 

आज जारी गरिएको प्रेस विज्ञप्तिमा नगर सभापति लव कुमार मण्डलले सर्वपक्षीय छलफलमा अन्य प्रमुख दलहरूलाई बोलाए पनि राष्ट्रिय स्वतन्त्र पार्टीलाई नसमेट्नु गम्भीर विषय भएको उल्लेख गरेका छन्।

विज्ञप्तिमा भनिएको छ, “देशको चौथो ठूलो शक्ति भएको राष्ट्रिय स्वतन्त्र पार्टीलाई यस किसिमको महत्वपूर्ण छलफलबाट बाहिर राख्नु निन्दनीय छ।”

राष्ट्रिय स्वतन्त्र पार्टी, लहान नगर समितिले यस कदमलाई अन्यायपूर्ण ठहर गर्दै नगरपालिकाको यस्तो रवैयाप्रति कडा आपत्ति जनाएको छ। पार्टीका तर्फबाट बैठकमा समावेश नगरिनुले नगरपालिका जनताका समस्याप्रति संवेदनशील नभएको र निष्पक्षतामा प्रश्न खडा गरेको उल्लेख गरिएको छ।

सभापति मण्डलले विज्ञप्तिमा राष्ट्रिय स्वतन्त्र पार्टीले सधैं जनताको पक्षमा काम गर्ने प्रतिवद्धता दोहोर्याउँदै आगामी दिनमा जनतालाई प्रत्यक्ष सरोकार राख्ने यस्ता कार्यक्रमहरूमा आफ्नो सहभागिता सुनिश्चित गर्न नगरपालिकासँग आग्रह गरेका छन्। 

राष्ट्रिय स्वतन्त्र पार्टीले भविष्यमा यस्तो प्रकारको भेदभाव नगर्न नगरपालिकालाई चेतावनी दिँदै, जनताको हकहितमा कुनै सम्झौता नगर्ने स्पष्ट पारेको छ।