राजतन्त्र ब्युँताउने प्रयास दिवास्वप्न मात्र हो : उपेन्द्र यादव

महोत्तरी, वैशाख ३ गते । जनता समाजवादी पार्टी (जसपा) नेपालका अध्यक्ष उपेन्द्र यादवले नेपालमा राजतन्त्र पुनःस्थापनाको प्रयासलाई 'दिवास्वप्न'को संज्ञा दिएका छन्। जसपा नेपालको महोत्तरी जिल्ला अधिवेशनको उद्घाटन सत्रमा बोल्दै यादवले नेपाली जनताको त्याग र बलिदानीले ल्याएको सङ्घीय लोकतान्त्रिक गणतन्त्र कुनैपनि शक्तिले मेटाउन नसक्ने दाबी गरेका हुन्।

उनले केही व्यक्ति र समूहहरू लोकतन्त्र समाप्त पारेर राजतन्त्र ब्युँताउने षड्यन्त्रमा लागेको बताए। तर, जनतामा त्यस्ता प्रयासप्रति सजगता र चनाखोपन रहेको भन्दै, 'उनीहरूको सपना कहिल्यै पुरा हुने छैन,' यादवले भने।

अध्यक्ष यादवले वर्तमान सरकारप्रति जनतामा आक्रोश र निराशा रहेको समेत बताए। 'देशमा अहिले देखिएको निराशाजनक अवस्था, विकासको अभाव, बेरोजगारी र मूल्यवृद्धि जस्ता समस्याको मूल जिम्मेवार यही सरकार हो,' उनले आरोप लगाए।

उनले आगामी निर्वाचनमार्फत जनताले वर्तमान सरकारलाई स्पष्ट जवाफ दिने विश्वास व्यक्त गरे। 'जनताको धैर्य चाँडै सकिन्छ,' यादवले भने, 'अबको निर्वाचन उनीहरूको आँखाको हिसाब–किताब हुनेछ।'

जिल्ला अधिवेशनको उद्घाटन कार्यक्रममा जसपाका स्थानीय नेताहरु, कार्यकर्ता र सर्वसाधारणको उल्लेख्य उपस्थिति रहेको थियो। यादवले अधिवेशनमार्फत संगठन बलियो बनाउने र जनताका मुद्दा उठाउँदै सशक्त राजनीतिक हस्तक्षेप गर्ने योजना रहेको बताए।