भगवानपुर–२ गमहरियामा स्वास्थ्य चौकी भवनको शिलान्यास

सिराहा । सिरहाको भगवानपुर गाउँपालिका–२, गमहरियामा नयाँ स्वास्थ्य चौकी भवनको शिलान्यास गरिएको छ।

एक विशेष कार्यक्रमका बीच गाउँपालिका अध्यक्ष उग्रनारायण यादवले उक्त भवनको शिलान्यास गरेको हो।

शिलान्यास समारोहमा बोल्दै अध्यक्ष यादवले हरेक नागरिकलाई सहज र सुलभ स्वास्थ्य सेवा उपलब्ध गराउने उद्देश्यले स्वास्थ्य चौकीको निर्माण प्रक्रिया सुरु गरिएको जानकारी दिए। ‘गाउँवासीलाई आधारभूत स्वास्थ्य सेवा घरदैलोमै उपलब्ध गराउने हाम्रो लक्ष्य हो,’ अध्यक्ष यादवले भने, ‘स्वास्थ्य पहुँच नागरिकको मौलिक अधिकार हो, यसलाई सुनिश्चित गर्न गाउँपालिका प्रतिबद्ध छ।’
गाउँपालिका स्रोतका अनुसार भवन निर्माण कार्य छिट्टै सुरु भई तोकिएको समयसीमाभित्र सम्पन्न गरिनेछ। स्थानीयवासीले स्वास्थ्य सेवा नजिकै पाउने भएपछि खुसी व्यक्त गरेका छन्।

यस अवसरमा गाउँपालिकाका जनप्रतिनिधि, स्वास्थ्यकर्मी, स्थानीय नागरिक तथा सरोकारवाला निकायका प्रतिनिधिहरूको उपस्थिति रहेको थियो।

स्वास्थ्य चौकी भवनको निर्माणले गमहरियाका साथै आसपासका बासिन्दाहरूलाई समयमै उपचार तथा प्राथमिक स्वास्थ्य सेवा पाउने अवसर जुटाउने विश्वास गरिएको छ।