बालबालिकाहरुको आँखा सुरक्षाको लागि शिक्षकहरुलाई सचेतना

जिवछ उदासी
लहान,चैत ६ गते । लहान स्थित सगरमाथा चौधरी आँखा अस्पताल लहानले विद्यालयका बालबालिकाहरुको आँखा सुरक्षाको लागि सामुदायिक विद्यालयका शिक्षकहरुलाई एक दिवसीय सचेतना कार्यक्रम सम्पन्न गरेको छ । ‘रीच’ कार्यक्रम अन्तर्गत साम्दायिक विद्यालयका ३० जना शिक्षकहरुलाई सचेतना गराएको हो ।

(६–८) वर्ष उमेर समूहका बालबालिकाहरुको आँखाको सुरक्षाको लागि शिक्षक शिक्षिकाहरुको भूमिका महत्पूर्ण रहेकोले विद्यालय स्तरीय कार्यक्रम संचालन भइरहेको कार्यक्रम संचालक चिकित्सक विवश राणा र तीर्थ कुमार सिंहले जानकारी दिनुभयो ।

उहाँहरुको अनुसार टेढो आँखा ,दृष्टिदोष, मोतिविन्दु र जलबिन्दु लगायतका आँखाका समस्याहरु बालबालिकामा देखिएपछि विद्यालयका शिक्षक शिक्षिकाहरु पहिचान गरेर अस्पतालमा पुरयाउन शिक्षकहरुलाई आवश्यक जानकारीको लागि सचेतना कार्यक्रम ल्याएको हो । सन् २०१८ देखि विराटनगर आँखा अस्पतालले संचालन गरेको रीच कार्यक्रम लहानसगरमाथा चौधरी आँखा अस्पतालले २०१९ देखि संचालनमा ल्याएको हो ।

पिभिएस दृष्टिमापन गरेर बालबालिकाहरुमा देखिने आँखा सम्बन्धी समस्यालाई शिक्षकहरुले पहिचान गरी अस्पताल पठाएमा निःशुल्क उपचार, शल्यक्रिया र चश्मा समेत दिइने चिकित्सक सिंहले जानकारी दिनुभयो । उहाँको अनुसार लहान नगरपालिकाको १ देखि १० नम्बरसम्मका वडामा ६ हजार ९१९ बालबालिकाहरुको जाँच गर्दा २५० जनामा आँखाका समस्या देखिएको थियो भने १० जनाको शल्यत्रिया र ९८ जनालाई चश्मा दिएको थियो ।

दृष्टिदोषका कारण आँखा टेढो हुन सक्ने र समयमा उपचार नभएमा दृष्टि नै गुम्न सक्ने अवस्था आउन सक्ने प्रशिक्षक चिकित्सक सिंहले सचेत गराँउदै बालबालिकाहरुको आँखा जोगाउन शिक्षकहरुको अहम भूमिका हुने सचेत गराउनु भएको थियो ।

आँखा सम्बन्धी सचेतना कार्यक्रमले विद्यालका बालबालिकाहरुको हेरचाह गर्न एक दिवसीय सचेतना तालिम कार्यक्रमले ठूलो उपलब्धी हुने श्री जनता आधारभूत विद्यालय लहान मटियर्वाका शिक्षका राखी चौधरीले भन्दै सिकेको ज्ञानलाई विद्यालयमा गएर व्यवहारमा उतार्ने विश्वास व्यक्त गर्नुभयो ।