माओवादी लडाकू शिविर घोटालाबारे छानबिनको माग गर्दै अख्तियारमा उजुरी

काठमाडौं । माओवादी लडाकू शिविरमा भएको घोटालाबारे छानबिनको माग गर्दै अख्तियार दुरुपयोग अनुसन्धान आयोगमा उजुरी परेको छ।

सिन्धुली निवासी युवराज पौडेल सफलले माओवादी अध्यक्ष पुष्पकमल दाहाल ‘प्रचण्ड’, उपमहासचिव वर्षमान पुन, जनार्दन शर्मा, पूर्व उपराष्ट्रपति नन्दकिशोर पुन र चक्रपाणी खनालसहित १३ जनाविरुद्ध उजुरी दर्ता गरेका हुन्।

उजुरीमा विस्तृत शान्ति सम्झौता पश्चात् सेना समायोजनको क्रममा माओवादी नेताहरूले सेनाको पोशाकमा फोटो खिचाएर राज्यकोषबाट रकम निकासा गरिएको आरोप लगाइएको छ।

माओवादी अध्यक्ष प्रचण्डले एक भिडियोमा ७ हजार लडाकूलाई ३५ हजार पुर्‍याएर २० हजार लडाकू भेरिफिकेसनमा पारिएको बयानलाई समेत उजुरीमा प्रमाणका रूपमा समावेश गरिएको छ।

उक्त समयमा संयुक्त राष्ट्रसंघीय मिसन (अनमिन)ले १९ हजार ६ सय लडाकू प्रमाणित गरेको थियो। पौडेलले माओवादी शिविर व्यवस्थापनका लागि ६ वर्षमा २० अर्ब रुपैयाँ खर्च भएको र अधिकांश रकम प्रचण्डको योजनामा निकासा भएको दाबी गरेका छन्। यस क्रममा माओवादीले ४ अर्ब रुपैयाँ हिनामिना गरेको आरोप उजुरीमा लगाइएको छ, जसका आधारमा दोषीहरूमाथि कडा कारबाहीको माग गरिएको छ। अख्तियारले उजुरी दर्ता गरिसकेको छ।