दशैंमा दुलहीझैँ सिँगारियो लहानको दुर्गा मन्दिर, दर्शनार्थीको घुइँचो

लहान, सिरहा। दशैंको अवसरमा सिरहाको लहान नगरपालिका–७ स्थित ऐतिहासिक दुर्गा मन्दिर झिलिमिली बत्ती र आकर्षक सजावटले दुलहीझैँ सिँगारिएको छ। मन्दिर परिसरदेखि प्रवेशमार्गसम्म गरिएको सजावटले भक्तजन तथा सर्वसाधारणलाई आकर्षित गरेको हो।

नवनिर्मित मन्दिरको आकर्षक स्वरूप अवलोकन गर्न र दुर्गा भवानीको दर्शन गर्न विभिन्न स्थानबाट श्रद्धालुहरू पुगिरहेका छन्। मन्दिर परिसरमा पूजाआजा गर्ने भक्तजनसँगै तस्बिर खिच्ने तथा रील्स र टिकटक भिडियो बनाउने युवायुवतीको समेत उल्लेख्य भीड देखिएको छ।

दशैंको धार्मिक उत्सवसँगै मन्दिरमा बढेको चहलपहलले लहानको धार्मिक तथा सांस्कृतिक महत्त्वलाई थप उजागर गरेको छ। आकर्षक सजावटका कारण दुर्गा मन्दिर स्थानीयवासीसँगै बाहिरबाट आउने आगन्तुकका लागि पनि आकर्षणको केन्द्र बनेको छ।

मन्दिरमा बढ्दो भीडलाई व्यवस्थित बनाउन सरसफाइ, आवागमन व्यवस्थापन र सुरक्षा सतर्कतामा ध्यान दिनुपर्ने देखिन्छ। धार्मिक आस्था, सांस्कृतिक उत्साह र सामाजिक गतिविधिको संगम बनेको लहानको दुर्गा मन्दिरले यस वर्षको दशैंमा विशेष रौनक थप्ने छ।

यही असोज २५ गते नवनिर्मित मन्दिरको उद्घाटन गर्ने जनाइएको छ।