लहानमा रोग प्रतिरोधात्मक क्षमता बढाउने औषधि निःशुल्क वितरण हुँदै

फिरोज सिद्दिकी

लहान । मारवाडी सेवा समिति लहानले रोग प्रतिरोधात्मक क्षमता बढाउने होमियोप्याथिक औषधी निःशुल्क वितरण गरेको छ ।

कोरोना भाइरसको महामारी फैलिएको समयमा होमियोप्याथिक चिकित्सा पद्दतीमा रोग प्रतिरोधात्मक क्षमता वृद्धि गर्ने औषधि मंगलवार मारवाडी सेवा सदन लहानमा निःशुल्क वितरण भएको हो ।

हाल विश्वमा महामारीको रुपमा फैलिएको कोरोना भाइरस (कोभिड–१९) सँग लड्न रोग प्रतिरोधात्मक शक्ति वृद्धि गरेमा रोगबाट बच्न सकिन्छ भन्ने मान्यता रहेको छ ।

‘सेवा परमो धर्म’ भन्ने ध्येयका साथ नेपाल राष्ट्रिय मारवाडी परिषद् र मारवाडी सेवा समिति काठमाडौंको सौजन्यमा वितरण गरिएको औषधि सबैले लिन सक्ने मारवाडी सेवा समिति लहानका अध्यक्ष संजय अग्रवालले जानकारी दिनु भयो ।

उहाँले बालबालिका, गर्भवती महिला समेतले लिन सक्ने साइड इफेक्ट नभएको रोग प्रतिरोधात्मक क्षमता भएको जसले रोगसंग लडने क्षमता बढाउने निःशुल्क वितरीत होमियोप्याथिक औषधी सेवन गर्न सबैसंग आग्रह गर्नुभएको छ ।

मारवाडी सेवा समिति काठमाडौले कोभिड–१९ विरुद्धमा देशव्यापी अभियान चलाउने क्रममा हाल देशभरिका विभिन्न शाखाबाट उक्त औषधि निःशुल्क वितरण भैरहेको समितिका महासचिव महावीर घिराईयाले जानकारी दिनुभयो ।