दुई प्रमुख शर्तहरू सहित खुट्टी खोला नहर संघर्ष समिति वार्ता र सहकार्यको पक्षमा

फिरोज सिद्दिकी 

लहान । खुट्टी खोला नहर संघर्ष समितिले वार्ता र सहकार्यको माध्यमबाट सिंचाई नहरको विवाद समाधानको पहल गर्दै दुई प्रमुख शर्तहरू प्रस्तुत गरेको छ। 

संघर्ष समितिका अनुसार, लहान नगरपालिका वार्ड नं. १० मा निर्माण भएको खुट्टी खोला सिंचाई नहरमा राखिएको हयुम पाईपलाई हटाउनु पर्नेछ र नहरको सही सिमाना छुट्याई त्यहाँ बनेका संरचनाहरू पनि हटाउनुपर्नेछ शर्तहरू अघि सारेको हो।

समितिका संयोजक धर्मराज चौधरीले भने, "वार्ता र सहमति नै समस्याको समाधानको बाटो हो। तर, हामीले उठाएका दुई प्रमुख शर्तहरू स्थानीय सरकारले अवश्य पूरा गर्नु पर्छ।" उनले किसानहरूको हक र स्वार्थको रक्षा गर्नका लागि संघर्ष जारी राख्ने प्रतिबद्धता व्यक्त गरे।

समितिले स्थानीय सरकारले हालै विज्ञ टोलीको प्रतिवेदनका आधारमा सर्वपक्षीय वार्ता गर्नका लागि चासो देखाएको बारेमा सामाजिक सञ्जालमार्फत जानकारी पाएको पनि उल्लेख गरेको छ। चौधरीले नगरबासी र किसान दाजुभाइहरूलाई समस्याको समाधानको लागि सक्रियता देखाउन र वार्तामा सहभागी हुन आग्रह गरे।

समितिका सदस्य र स्थानीय किसानहरूले यो मुद्दालाई प्राथमिकता दिएर समाधान खोज्नुपर्नेमा जोड दिएका छन्। खुट्टी खोला संघर्ष समिति सबै स्थानीय नागरिक र किसान दाजुभाइहरूलाई एकजुट भएर समस्या समाधानमा सहयोग गर्न आह्वान गरेको छ। खुट्टी खोला नहरको विवाद समाधान नभएसम्म संघर्ष समिति आन्दोलित रहने पनि बताइएको छ।