सिरहामा प्रतिबन्धित महुर प्रजातिको माछा नियन्त्रणमा, सशस्त्र प्रहरीद्वारा नष्ट

फिरोज सिद्दिकी 

सिरहा, माघ ७ गते । सिरहाको ठाडीस्थित प्रस्तावित सशस्त्र प्रहरी सीमा सुरक्षा गुल्मको टोलीले बुधबार नेपालतर्फ अवैध रूपमा ल्याइँदै गरेको प्रतिबन्धित महुर प्रजातिको भुरा माछा नियन्त्रणमा लिई नष्ट गरेको छ।  

सशस्त्र प्रहरी निरीक्षक राजेश आचार्यका अनुसार भारतबाट नेपालतर्फ ल्याउन खोजिएको करिब १५ केजी महुर प्रजातिको माछालाई सशस्त्र प्रहरीले नियन्त्रणमा लिएर प्रहरी कार्यालय हाताभित्र नष्ट गरिएको हो।  

महुर प्रजातिको माछा नेपालमा स्वास्थ्य जोखिमको कारणले प्रतिबन्धित छ। यस माछाको सेवनले क्यान्सरजस्ता गम्भीर रोगहरू निम्त्याउन सक्ने भएकाले नेपाल सरकारद्वारा यसको आयात र खपतमा पूर्ण प्रतिबन्ध लगाइएको छ।  

सिरहाको सीमा क्षेत्रमा अवैध वस्तुहरूको ओसारपसार नियन्त्रणका लागि सुरक्षा निकायहरूले थप कडाइ गर्दै आएका छन्। यो घटनाले सीमा क्षेत्रमा अनुगमनको प्रभावकारिता पुष्टि गरेको स्थानीयहरूले बताएका छन्।