राजदेवी जाने पक्की सडक निर्माण कार्य प्रारम्भ

जिवछ उदासी/फिरोज सिद्दिकी

लहान, जेठ २४ गते । लहान नगरपालिका १५ ढोडनामा रहेको धार्मिक पर्यटकीय क्षेत्र पञ्चावती राजदेवी मन्दिर जाने पक्की सडकको निर्माण कार्य प्रारम्भ भएको छ ।

लहान नगरप्रमुख मुनि साहले खुटी पारी लहान १८ भदैयादेखि लहान १५ स्थित राजदेवी मन्दिरसम्मको साढे चार किलोमिटर पक्की सडक निर्माण कार्यको शिलान्यास गर्दै प्रारम्भ गरेको हो ।

शिलान्यास गर्दै प्रमुख साहले भन्नुभयो, ‘पक्क्ी सडक निर्माणले राजदेवी मन्दिरमा आउने जाने धार्मिक पर्यटकहरुको लागि मात्रै सहज नभएर उत्तरी भेगको विकासमा समेत कोसे ढुङगा सावित हुनेछ । ग्रामीण र शहरी क्षेत्रको विकासलाई प्राथमिकतामा राखेर सबै योजनाहरु प्रारम्भ भैसकेका छन् । आफ्नो कार्यकालमा वाचा गरेका ९० प्रतिशत कामहरु पुरा गर्नेगरी अघि बढिरहेका छौ । प्रदेश र संघीय सरकारले सहयोग गरे बाँकी दस प्रतिशत काम पनि पुरा गर्न नगरपालिका प्रयासरत रहेको छ ।’

उहाँले यस सडक निर्माण कार्यको लागि ६ करोडमा टेण्डर लागेको भन्दै यसलाई गुणस्तरीय र समयमै सम्पन्न गर्न लहान १५ का वडाध्यक्ष तेज नारायण चौधरी र लहान १८ का वडाध्यक्ष मो. सम्शेर लगायत स्थानीयवासीहरु सहयोग र अनुगमन दुवै गर्न समेत आग्रह गर्नुभयो ।