नवराजपुरमा कानूनी सचेतना कार्यक्रम सम्पन्न

दुर्गा परियार,

लहान । जिल्ला सरकारी वकिल कार्यालय सिरहा, नवराजपुर गाउपालिका, इलाका प्रहरी कार्यालय महेशपुर पतारीको आयोजना र इन्सेक, ओरेक, मुत्ति नेपाल र समग्रजनउत्थान केन्द्रको सहकार्यमा बुधबार महिला हिंसा तथा बोक्सीको आरोप सम्बन्धी कानूनी सचेतना कार्यक्रम सम्पन्न भएको छ ।

बढदो महिला हिंसा र बोक्सीको आरोपमा महिलाहरु माथी भैरहेको दुरव्यवहार कम गर्न कानूनी ज्ञान प्रदान गर्न इन्सेक लगायत अधिकारको क्षेत्रमा काम गर्ने संस्थाहरुको सहकार्यमा जिल्ला सरकारी वकिलको कार्यालयले नवराजपुर गाउपालिकामा कार्यक्रम संचालन गरेको थियो ।

कार्यक्रममा प्रमुख अतिथि नवराजपुर गाउपालिकाको उपाध्यक्ष शोभा यादवले आफनै गाउपालिकामा बोक्सीको आरोपमा भएको अमानविय घटनाले देश सामुनै गाउपालिका बदनाम भएको बताउनु भयो । अब उपरान्त यस्ता अमानविय घटना दोहरीन नदिने प्रतिबद्धता गर्दै उपाध्यक्ष यादवले संस्थाहरुको सहकार्यमा सबै वडामा सचेतना मुलक कार्यक्रम संचालन गर्ने बताउनु भयो ।

त्यसैगरी मानवअधिकारकर्मी सुनिल कुमार साहले यत्रो गाउको बीचमा एउटा महिला माथि सबैको रोहबरमा घटना हुनु निन्दनीय भएकोले सम्पुर्ण मानवजगत नै कलंकित भएको बताउनु भयो । यस्तो गल्ती नदोहरीनको लागि यूवाहरु अगाडी आउनु पर्ने र समाजलाई कलंकित हुन बाट जोगाउनु पर्ने जिम्मा यूवाको रहेको साहले बताउनु भयो ।

कार्यक्रममा जिल्ला सरकारी वकिल एकराज अधिकारीले महिला माथी हुने हिंसाका घटनामा हुने सजाय तथा बोक्सीको आरोपमा नेपालमा भएका कानूनी प्रकृया बारे जानकारी गराउनु भएको थियो । अपराधीहरुलाई समाजले संरक्षण गर्दा दिनदिनै यस्ता घटनाहरु बढने भएकोले अपराधीलाई संरक्षण नगरि दिन आग्रह गर्नु भएको थियो ।
कार्यक्रममा मानवअधिकारकर्मीहरु, महिला अधिकारकर्मी, शिक्षक, जनप्रतिनिधि लगायत स्थानीयहरुको उपस्थिती रहेको थियो ।

नवराजपुर गाउपालिका—५ मा भदौ २७ गते कथित बोक्सीको आरोपमा ४१ वर्षीया मुर्तिदेवी यादवलाई स्थानीयहरुले बोक्सीको आरोप लगाइ कुटपिट गर्नुका साथै अभक्ष खुवाएकोले सचेतनाको लागि सोही ठाउमा कार्यक्रम संचालन गरेको ओरेककी देवकुमारी महराले जानकारी भयो ।