अन्ततः बादलको पनि प्रचण्डसँग डिभोर्स

काठमाडौं । नेकपा विभाजनमा कतै पनि नखुलेका सचिवालय सदस्य एवं गृहमन्त्री रामबहादुर थापा अन्ततः केपी शर्मा ओलीकै पक्षमा उभिने निर्णयमा पुगेका छन् ।

पार्टी विभाजनको स्पष्ट सन्देश प्रवाह गर्नुपूर्व दुवै पक्षले बोलाएको केन्द्रीय समिति एवं पूर्वसांसदहरूको भेलामा थापा तटस्थ देखिएका थिए । उनीपक्षीय पूर्वमाओवादी खेमाका अधिकांश नेताले भने उनलाई प्रचण्ड–माधव नेपाल समूह रोज्न सुझाएका थिए । तर तर केही दिनको मौनता पछि थापाले केपीको साथ छाड्न नसक्ने निर्णय उनीनिकट नेतालाई सुनाएका छन् ।

यद्यपि, थापाले यसबारे औपचारिक रूपमा केही बताएका छन् । बिहीबार यसबारे जानकारी दिने तयारी थापाले गरेको बुझिएको छ ।

‘पार्टी विभाजनपछि आफूनिकटस्थसँग छलफल गर्नु भएका थापा अन्ततः प्रचण्ड–माधव समूहलाई नभएर केपी शर्मा ओलीलाई नै साथ दिने निष्कर्षमा पुग्नु भएको छ,’ बादलनिकट एक नेताले साँघुसँग भने ।

बादलले प्रधानमन्त्रीको समूहमा रहने निर्णय लिएपछि उनीनिकट केन्द्र तथा जिल्ला तहका नेतालाई यसबारे जानकारी दिइएको छ । केहीले बादलको निर्णयप्रति असन्तोष जनाएका छन् । बादलनिकट लुम्बिनी प्रदेशका प्रदेशसभा सदस्य आईपी खरेलले उनको राजनीतिक यात्राप्रति शुभेच्छा प्रकट गर्दै सति जान नसक्ने तिखो टिप्पणी गरेका छन् ।

कित बिग्रियो प्रचण्ड–बादल सम्बन्ध ?

तत्कालीन माओवादीले सञ्चालन गरेको सशस्त्र संघर्षमा महत्त्वपूर्ण भूमिका निर्वाह गरेका बादलको त्यसका नेतृत्वकर्ता प्रचण्डसँगको यो दोस्रो डिभोर्स हो । यसअघि पनि उनले प्रचण्डको शैलीप्रति असन्तुष्टि जनाउँदै एक समूह लिएर पार्टी विभाजन गरेका थिए । अलग पार्टीले खासै गति लिन नसकेपछि भने थापा पुनः मूल घरमै फर्किए ।

केपी ओली नेतृत्वमा सरकार निर्माण हुने भएपछि पूर्वमाओवादीको भागमा परेको गृहमा थापालाई पठाउन उनै प्रचण्डको जोडबल थियो । तर मन्त्री भएपछि प्रचण्ड र बादलको सम्बन्ध सुमधुर रहेन । केपीसँगको द्वन्द्वमा प्रचण्डले बादलबाट साथ खोजेका थिए । तर बादलले प्रचण्डको अपेक्षा पूरा गर्न सकेनन् । एउटै मन्त्रिपरिषदमा रहँदासम्म केपीको विरोधमा लाग्नु अनैतिक हुने तर्क थियो । यही कारण चिसिन पुगेको सम्बन्ध अन्ततः पार्टी विभाजन हुँदासमेत सङ्लन नसकेको बताइन्छ ।

बादलले ओली समूहमा लाग्ने निर्णय लिए पनि उनीपक्षीय पुराना नेता भने प्रचण्डतिर लागेका छन् । देव गुरुङ, पम्फा भुसाल, लेखनाथ न्यौपानेलगायत नेता बादलतिर नलागेर अर्को समूहमा मिसिएका हुन् । साँघु न्यूजबाट