जनकपुरमा जनमत पार्टीका कार्यकर्ता हिंसामा उत्रिए, जनप्रतिनिधिमाथि आक्रमण

सिरहा । सिके राउत नेतृत्वको जनमत पार्टीका कार्यकर्ताहरुले विभिन्न नगरपालिकाका प्रमुख, प्रदेशसभा सदस्यलगायतका जनप्रतिनिधिहरु चढने गाडी तोडफोड गरेका छन् ।

बुधबार मधेश प्रदेशका राजधानी जनकपुरमा कयौं सरकारी गाडीमा तोडफोड गर्नुका साथै चिकित्सकदेखि जनप्रतिनिधिसम्मलाई आक्रमण गरेका हुन् ।

सोही क्रममा जनमत पार्टीका कार्यकर्ताहरुले सिरहाको लहान नगरपालिकाका नगरप्रमुख चडढने गाडी रोकिराखेको अवस्थामा तोडफोड गरेका छन् । नगरप्रमुख राष्ट्रिय सभा निर्वाचनमा मत हाल्न जनकपुरधाम गएका थिए ।

आज राष्ट्रिय सभा सदस्यहरुको लागि भइरहेको निर्वाचनमा मतदान गर्न जनकपुरधाम पुगेकोबेला पिडारीचोक, मुरलीचोक, जानकी मन्दिरको वरिपरि बासको फाटा लिएर आक्रमक रुपमा जनप्रतिनिधि चढेको गाडी खोजी खोजी तोडफोड गरेका छन् ।

अहिंसक गान्धीवादी आन्दोलन गर्दै आइरहेका डा सिके राउतले हातमा फूल थमाएर शान्तीपूणर् आन्दोलन गरिने नीति लिएपनि केहि दिन यता तोडफोडको आन्दोलनलाई वढाबा दिएको छ ।

जनकपुरधाममा राष्ट्रियसभाको निर्वाचनस्थलमा ‘मल देउ, मत लेउ’ भन्दै प्रदर्शनमा उत्रिएका जनमत पार्टीका कार्यकर्ता आक्रामक रुपमा प्रस्तुत हुँदै जलेश्वर अस्पतालका निमित्त प्रमुख डा.सतिष साहमाथि जनकपुरधामको पिडारी चोकमा आक्रमण गरेका थिए । आक्रमणमा घाइते भएका डा. साहको मुखमा ८ वटा टाँका लगाइएको छ । डा. साह चढ्ने प्रदेश २-०२-००१ झ ०१६३ नम्बरको सरकारी गाडीमा आन्दोलनकारीले आक्रमण गरेका थिए ।

मधेस प्रदेशमा जारी राष्ट्रियसभा निर्वाचनमा अवरोध गर्ने उद्देश्यले सीके राउत नेतृत्वको जनमत पार्टीका कार्यकर्ताले मतदानका लागि आउँदै गरेका जनप्रतिनिधि सवार ८ वटा सरकारी गाडीमा तोडफोड गरेका छन् ।

राउतका कार्यकर्ताले जनकपुरधामको पिडारी चोकमा लाठी, ढुंगामुढा गरेर जनता समाजवादी पार्टीका प्रदेश सभाका सदस्य अशोक यादवको गाडीमा तोडफोड गरेका छन् । सो क्रममा प्रदेशसभाका सदस्य यादवको हात भाँचिएको छ ।

प्रदेश २-०३-०१ झ ००२०, प्रदेश २-०१ झ ००१८, प्रदेश २-०१ झ-००८०, स.१ झ ५१० नम्बरलगायतको सरकारी गाडीमा प्रदर्शनकारीले तोडफोड गरेका छन् । प्रदर्शनकारीहरुले आक्रमण गर्दा सर्लाही जिल्लाका हरिवन नगरपालिकाका नगर प्रमुख गणेश प्रसाई र उममेयर रेणुका पौडेल घाइते भएका छन् । अहिलेसम्म प्रदर्शनकारी र प्रहरी बीच भएको झडपमा ८ जना प्रदर्शनकारी तथा ४ जना प्रहरी घाइते भएका छन् ।