लहानमा वाणिज्य कार्यालय र स्थानीय प्रशासनको अनुगमन, ६ वटा पसललाई एक लाख १५ हजार जरिवाना

फिरोज सिद्दिकी,

लहान । सिरहाको लहानमा वाणिज्य, आपूर्ति तथा उपभोक्ता संरक्षण कार्यालय वीरगंज र स्थानीय प्रशासनको संयुक्त टोलीले लहान बजार अनुगमन गरेको छ । बजार अनुगमन टोली बजारमा आएपछि अधिकांश पसलहरु बन्द भएको छ ।

वाणिज्य आपूर्ति तथा उपभोक्ता संरक्षण कार्यालय, इलाका प्रशासन कार्यालय लहान र घरेलु तथा साना उद्योग कार्यलय लहानको संयुक्त अनुगमन टोलीले मूल्य सूची नराखेको, खरिद र बिक्री विल उपलब्ध गराउन नसकेका, म्याद गुज्रेका खाद्ययपदार्थ बिक्री वितरण गर्ने पसलहरुलाई कारबाही गरेको हो ।

अनुगमनका क्रममा लहान ८ स्थित रहेको माखनभोग स्वीट एण्ड नमकिनलाई ५० हजार, लहान १ स्थित रहेको माँ सती अनसुइया किराना पसललाई २० हजार, जय महिमा सप्लायर्स र सरस्वती खाद विज भण्डारलाई १५/१५ हजार जरिवाना गरिएको छ ।

त्यस्तै एस टी एम फर्मा प्रा.लि.लाई १० हजार र नोवेल मोवाईल हाउसलाई ५ हजार जरिवाना गरिएको वाणिज्य, आपूर्ति तथा उपभोक्ता संरक्षण कार्यालयका सूचना अधिकारी दिलिप कुमार खंग खत्वेले जानकारी दिनु भयो ।

अमित रेडिमेड जेनर स्टोर र इश्वर ट्रेड एण्ड सप्लायर्सलाई सामान्य अनुगमन गरिएको जानकारी दिनुभयो । अनुगमनका क्रममा बरामद भएका उपभोग गर्ने म्याद नाघेका पेयपदार्थ, अखाद्य वस्तु जफत गरिएको वाणिज्य कार्यालयका सूचना अधिकारी खत्वेले जानकारी दिनुभयो । जरिवाना गरिएको फर्मलाई ७ दिन भित्र बैंकमा जरिवानाको रकम दाखिला गर्न निर्देशन दिइएको जनाइएको छ ।

बजार अनुगमन गर्दा तत्काल जरिवाना हुन सक्ने कसुर भए गरेको पाइएमा उपभोक्ता संरक्षण ऐन, २०७५ को दफा ३८ बमोजिमको कसूरमा सोही ऐनको दफा ३९ बमोजिम तत्काल जरिवाना जरिएको जनाइएको छ । ऐन, नियममा रहेका प्रावधानहरु पालना गर्न सम्पूणर् व्यवसायीहरुलाई अनुरोध समेत गरेका छन् ।