श्री माध्यमिक विद्यालय लहान गोठको विद्यार्थी भर्ना अभियान र्‍याली सम्पन्न

फिरोज सिद्दिकी,

लहान । ‘समयमै भर्ना समयमै ज्ञान, गुणस्तरीय शिक्षा सबैको अभियान’ भन्ने नाराका साथ सिरहाको लहान ९ मा रहेको श्री माध्यमिक विद्यालय लहान गोठले विद्यार्थी भर्ना कार्यक्रम अन्तरगत र्‍याली सम्पन्न गरेको छ ।

शैक्षिक सत्र २०८० का लागि श्री माध्यमिक विद्यालय लहान गोठका विद्यार्थी र शिक्षकहरुको सहभागीतामा र्‍याली सम्पन्न गरेको हो ।

उक्त र्‍याली बासाजोडी, शोभापुरको सिमाना हुँदै लवका टोल, पुरानो टोल, रामजानकी टोल, पछवारी टोल लगायतका स्थानहरुमा परिक्रमा गरेको थियो ।

निमित्त प्रधानाध्यापक जितेन्द्र महतोले यस माध्यमिक विद्यालय लहान गोठले प्रत्येक वर्षको शैक्षिक प्रारम्भसँगै आम सर्वसाधारणको जानकारीका लागि यस्तो र्‍यालीको आयोजना गरी अभिभावकको ध्यान खिच्न सकेको बताउनुभयो ।

हामीले यस माध्यमिक विद्यालयलाई नमूना विद्यालय बनाउने उद्देश्यका साथ अघि बढेका छौं । यहाँ बाल विकासदेखि कक्षा ९ सम्मको नयाँ भर्ना खुल्ला गरिएको छ । शिक्षा हासिल गर्नका लागि शान्त वातावरण रहेको यस मा.वि.मा आवश्यक पर्ने भौतिक एवम् शैक्षिक सामग्रीको प्रयाप्ता रहेको छ । निःशुल्क अध्ययनको अवसरका साथै स्वस्थ्यकर खाजा खान पाउने अवसरको संपूणर् लाभ विद्यार्थीले उपयोग गर्न पाउन भन्ने थप उद्देश्यले र्‍यालीको आयोजना गरिएको निमित्त प्रधानाध्यापक महतोले जानकारी दिनुभयो ।

बाल विकासदेखि कक्षा २ सम्म अंग्रेजी माध्यममा कक्षा संचालन हुने जनाउदै उहाँले हामी सँग अत्यन्तै योग्य र तालिमप्राप्त शिक्षकहरुको टीम हुनुका साथै भौतिक सुविधा सम्पन्न शैक्षिक पूर्वाधार समेत रहेकोले अभिभावकलाई एकपटक विद्यालयको अवलोकन भ्रमणको निम्तो दिन पनि र्‍यालीको आयोजना गरिएको महतोले बताउनुभयो ।

लहान ९ का वडाध्यक्ष घुरन चौधरीले यस्तो र्‍यालीबाट शिक्षकहरु थप उत्साहित हुने र समुदाय प्रति विद्यालयको जिम्मेवारीलाई बुझ्न र्‍यालीले सहयाग पुगेको बताउनु भयो ।

उहाँले ऐतिहासिकता र गौरवमय शैक्षिक बिरासत बोकेको यस माध्यामिक विद्यालयको सकारात्मक पक्षलाई जनसमक्ष लिएर जाने प्रयत्न स्वरूप यो र्‍यालीको आयोजना गरिएको बाताउनु भयो ।

लहान नगरपालिकाको साझेदारीमा श्री मा.वि.लहान गोठले आयोजना गरेको विद्यार्थी भर्ना कार्यक्रममा सिविएमको आर्थिक सहयोग तथा सि.एम.सी.नेपालको प्राविधिक सहयोग रहेको थियो ।