नेपाली काँग्रेस क्षेत्रीय समितिद्वारा शुभकामना आदान प्रदान

 

जीवछ उदासी 

लहान,कातिक ३० गते ।

नेपाली काँग्रेस सिरहा -१ क्षेत्रीय समितिले शुभकामना आदान प्रदान कार्यक्रम आयोजना गरेको छ । 

बितेको दसैं दिपावली र आउने छठ पर्वको अवसरमा क्षेत्रीय कमिटिले लहान नगरपालिकाको सभा हलमा शुभकामना आदान प्रदान भएको थियो ।

क्षेत्रीय सभापति तथा लहान नगरपालिका प्रमुख महेश प्रसाद चौधरीले दुइ शब्द बोलेर सुरु भएको शुभकामना आदान प्रदान गर्दै चियापान कार्यक्रम सुरु भएको थियो । नेपाली काँग्रेसका संस्थापक नेता विपि कोइरालाले सुरु गरेको मेलमिलापको लागि आयोजना गरिएको चियापान कार्यक्रमलाई नेपाली काँग्रेसले निरन्तरता दिँदै आइरहेको छ । यो कार्यक्रम नेपाली काँग्रेसभित्र एक संस्कृति र चलनको रुप लिएको छ । 

नगरप्रमुख समेत रहनु भएको क्षेत्रीय सभापति चौधरीले नेपाली काँग्रेसभित्र रहेको आन्तरिक मनमुटाव हटाएर पार्टी बलियो बनाउन निर्वाचित जन प्रतिनिधिहरुलाई स्वस्थ्य सल्लाह दिएर अघि बढ्नुपर्ने बताउनुभयो । 

उहाँले थप्नुभयो,' हाम्रो लहान समुन्नत र सुन्दर लहान बनाउन सबैले सहयोग गरे मात्रै चुनावमा गरेका प्रतिवद्धताहरु पुरा हुनेछ । अब विवाद गरेर समय खेर फाल्नु भन्दा रचनात्मक काम गरेर जनताको मन जित्न आवश्यक छ ।' 

शुभकामना कार्यक्रममा नेपाली काँग्रेसका जिल्ला सभापति रामचन्द्र यादव,नेता राम सुन्दर चौधरी,सिरहा -१ क प्रदेशका सभापति सन्तोष उपाध्याय,ख प्रदेशका सभापति धर्मदेव यादव विभिन्न जनवर्गीय संगठनका नेताहरु लहान नगरपालिकाका सभापति सञ्य कुमार यादव वडा कमिटिका बुथ सभापतिहरुको गरी एक हजार उपस्थिति रहेको थियो ।