लहानको गोधुली होटलबाट ठगी आरोपमा मलेसियन नागरिक सहित ३ जना पक्राउ

फिरोज सिद्दिकी

लहान । नेपाली नागरिकहरूलाई कतार पठाइदिने भन्दै ठगी गरेको आरोपमा जिल्ला प्रहरी कार्यालय सिरहाले एक मलेसियन नागरिक सहित तीन नेपालीलाई पक्राउ गरेको छ।

शनिबार साँझ लहान नगरपालिका–४ स्थित गोधुली होटलबाट अवैध रूपमा अन्तर्वार्ता लिई रकम असुल गरेको आरोपमा इलाका प्रहरी कार्यालय लहानको टोलीले उनीहरूलाई नियन्त्रणमा लिएको हो।

पक्राउ परेकाहरूमा मलेसियन नागरिक ५१ वर्षिय मोहम्मद रिजुआन बिन अब्दुल्लाह, सिरहा लहान नगरपालिका–२३ का ४२ वर्षिय रामा शंकर यादव, २५ वर्षिय राम भरत यादव र ३९ वर्षका सुर्य नारायण यादव रहेका छन्।

अनुसन्धानका लागि सिरहा जिल्ला अदालतबाट चार दिनको म्याद थप गरी इलाका प्रहरी कार्यालय लहानमा अनुसन्धान कार्य अगाडि बढाइएको प्रहरी नायव उपरीक्षक बिरेन्द्र कुमार पासवानले जानकारी दिएका छन्।

यस घटनाको थप अनुसन्धान भइरहेको छ भने ठगी पीडितहरूको विवरण संकलन र घटनाका अन्य पक्षबारे अनुसन्धान भइरहेको प्रहरीले जनाएको छ।