सिरहाको लहानमा न्यायको माग गर्दै विरोध र्‍याली

 फिरोज सिद्दिकी 

लहान, माघ ११ गते । सिरहाको लहानमा बलात्कार, हत्या र जातीय छुवाछुतविरुद्ध न्यायको माग गर्दै विरोध र्‍याली निकालिएको छ। विभिन्न संघसंस्थाहरूको संयुक्त आयोजनामा लहानस्थित पशुपति आदर्श माध्यमिक विद्यालयको प्राङ्गणबाट सुरु भएको र्‍याली रमेश महतो चोकमा पुगेर कोण सभामा परिणत भएको थियो।

विरोध प्रदर्शनमा सहभागीहरूले 'दण्डहीनताको अन्त्य गर', 'रिंकु सदालाई न्याय दे', 'कानूनी शासन सुनिश्चित गर', 'न्याय किनबेच गर्न पाइँदैन' जस्ता नारासहित प्रदर्शन गरेका थिए। कोण सभामा महिला मानव अधिकार रक्षक सञ्जालकी केन्द्रीय अध्यक्ष श्यामकुमारी साहको विशेष उपस्थिति रहेको थियो।

वक्ताहरूले न्यायप्रणालीलाई प्रभावकारी बनाउन र पीडित परिवारलाई उचित क्षतिपूर्ति तथा मनोसामाजिक सहयोग सुनिश्चित गर्न माग गरे। उनीहरूले अपराधमा राजनीतिक हस्तक्षेप बन्द गर्नुपर्ने, मानव अधिकारको सम्मान हुनुपर्ने र कानूनी शासनलाई बलियो बनाउनुपर्ने कुरामा जोड दिए।

सिरहा जिल्लामा लगातार भइरहेको हिंसा, बलात्कार, हत्या तथा जातीय छुवाछुतजस्ता घटनाहरूले स्थानीयबासी चिन्तित बनेका छन्। पीडितका पक्षमा न्यायको सुनिश्चितता गर्न सरकारलाई दवाब दिने उद्देश्यसहित स्थानीय समुदाय तथा अधिकारकर्मीहरूले यस्ता विरोध कार्यक्रम सञ्चालन गर्दै आएका छन्।

विरोध प्रदर्शनमा स्थानीय नागरिक, मानव अधिकारकर्मी, सामाजिक अभियन्ता तथा विभिन्न संघसंस्थाका प्रतिनिधिहरूको उल्लेखनीय उपस्थिति रहेको थियो।