समाजको उज्यालो भविष्यका लागि बालिका शिक्षित हुनुपर्छ : प्रिन्सिपल हासिम राईन

राबिया बसरिया एजुकेशनल एकेडेमी (कन्या विद्यालय), लहानका संस्थापक प्रिन्सिपल मो. हासिम राईनले बालिका शिक्षामा गुणस्तरीय शिक्षा र व्यावसायिक तालिमको महत्वलाई उजागर गर्दै विद्यालयको विकास यात्रा प्रस्तुत गरेका छन्। हाम्रा सहकर्मीले उनीसँग गरिएको यस विशेष कुराकानीमा विद्यालयको स्थापना, नाम परिवर्तन र भविष्यका योजनाबारे विस्तृत चर्चा गरिएको छ। कुराकानीका केही संपादित अंशः

० विद्यालय स्थापना कहिले र किन गर्नुभयो?
— विद्यालयको स्थापना सन् २०१६ मा जामिया राबिया बसरिया लिलबनातको नामबाट गरिएको थियो। यो विद्यालय खोल्ने मुख्य उद्देश्य बालिका शिक्षालाई प्राथमिकता दिनु र उर्दु शिक्षालाई प्रवद्र्धन गर्नु थियो। उर्दु भाषाको माध्यमबाट धार्मिक र आधुनिक शिक्षा दिने सोच थियो।

० विद्यालयको नाम परिवर्तन किन गर्नुभयो?
— विद्यालयलाई नयाँ पहिचान दिन र आधुनिक शिक्षासँग सन्तुलन मिलाउन हामीले नाम परिवर्तन गरेर राबिया बसरिया एजुकेशनल एकेडेमी राख्यौँ। नाम परिवर्तनसँगै पाठ्यक्रममा पनि व्यापक सुधार गरेका छौँ।

० यहाँका छात्राहरूलाई के–कस्ता पाठ्यक्रमहरू पढाइन्छन्‌?
— हाल विद्यालयमा उर्दु शिक्षालाई प्राथमिकतामा राख्दै आलमियत कोर्ष र नाजरा ता फजिलत प्रदान गरिरहेका छौँ। यससँगै कक्षा १ देखि ८ सम्मका छात्राहरूलाई अंग्रेजी माध्यमबाट शिक्षित गराइरहेका छौँ। हामीले परम्परागत शिक्षाको साथमा आधुनिक शिक्षण प्रणालीलाई पनि आत्मसात् गरेका छौँ।

० व्यावसायिक तालिमका बारेमा के योजना छ?
— छात्राहरूलाई आत्मनिर्भर बनाउन सिपमूलक तालिम अनिवार्य बनाएका छौँ। हाल हामी सिलाई–कटाई, कम्प्युटर शिक्षा र अन्य जीवन उपयोगी तालिमहरू प्रदान गरिरहेका छौँ। यसले छात्राहरूलाई भविष्यमा स्वरोजगार र विभिन्न व्यवसायमा सहभागी गराउने हाम्रो उद्देश्य पूरा गर्न सहयोग गर्छ।

० भविष्यका योजना के छन्‌?
— हाम्रो मुख्य उद्देश्य विद्यालयलाई माध्यमिक स्तरसम्म विस्तार गर्नु हो। साथै, व्यावसायिक शिक्षालाई अझ सुदृढ गर्दै आधुनिक प्रविधिको माध्यमबाट शिक्षामा नयाँ–नयाँ प्रयोग गर्न चाहन्छौँ। डिजिटल लर्निङ प्लेटफर्मलाई समेत विद्यालयमा पूर्ण रूपमा कार्यान्वयन गर्ने योजना छ।

० बालिका शिक्षालाई प्रोत्साहन गर्न विद्यालयले के–कस्ता कार्यक्रम सञ्चालन गरिरहेको छ?
— हामीले छात्राहरूलाई प्रोत्साहन गर्न विभिन्न पुरस्कार वितरण कार्यक्रम, वार्षिक सांस्कृतिक कार्यक्रम र खेलकुद प्रतियोगिताहरू सञ्चालन गर्दै आएका छौँ। साथै, बालिका शिक्षा महत्वबारे समुदायमा सचेतना कार्यक्रमहरू आयोजना गरिरहेका छौँ।

० विद्यालयमा अनुशासन कायम गर्न के नीतिहरू अपनाउनुभएको छ?
— अनुशासन हाम्रो विद्यालयको प्रमुख विशेषता हो। प्रत्येक विद्यार्थीलाई समयपालन, सफाइ र नैतिक मूल्यहरू पालना गर्न प्रोत्साहित गरिन्छ। शिक्षकहरूलाई पनि सहनशील र आदर्श व्यवहार देखाउन प्रेरित गरिन्छ।

० अभिभावकहरूको विद्यालयसँगको सम्बन्धलाई कसरी सुधार गर्नुभएको छ?
— हामीले प्रत्येक महिनामा अभिभावक–शिक्षक भेला आयोजना गर्दै आएका छौँ। यस माध्यमबाट अभिभावकले आफ्ना छोरीहरूको शैक्षिक प्रगतिबारे प्रत्यक्ष जानकारी लिन सक्छन्। साथै, उनीहरूको सुझावलाई विद्यालय सुधारका लागि प्राथमिकतामा राख्छौँ।

० छात्राहरूको व्यक्तित्व विकासका लागि विद्यालयमा के कार्यक्रम छन्‌?
— व्यक्तित्व विकासका लागि हामीले नेतृत्व तालिम, वादविवाद प्रतियोगिता, वक्तृत्वकला र आत्मविश्वास अभिवृद्धि कार्यक्रमहरू सञ्चालन गर्छौँ। यसले छात्राहरूलाई भावी जीवनमा हरेक चुनौतीलाई सामना गर्न सक्षम बनाउँछ।

० विद्यालयको दीर्घकालीन लक्ष्य के हो?
— हाम्रो दीर्घकालीन लक्ष्य भनेको विद्यालयलाई माध्यमिक र उच्च माध्यमिक स्तरसम्म विस्तार गर्नु हो। साथै, छात्राहरूलाई उच्चस्तरीय प्राविधिक र व्यवसायिक शिक्षामा प्रशिक्षित गर्ने योजनामा छौँ। हामी चाहन्छौँ कि हाम्रा छात्राहरू भविष्यमा राष्ट्रको लागि सक्षम र जिम्मेवार नागरिक बनून्।

० समाजलाई तपाईंको सन्देश के हो?
— बालिका शिक्षाको महत्वलाई सबैले गम्भीरतापूर्वक बुझ्नुपर्छ। शिक्षित महिलाहरूले मात्र समाज र राष्ट्रलाई सही मार्गदर्शन गर्न सक्छन्। बालिकाहरूलाई शिक्षित बनाउनु भनेको हाम्रो समाजको भविष्य निर्माण गर्नु हो। समाजको उज्यालो भविष्यका लागि बालिका शिक्षित हुनुपर्छ।