महायज्ञको नाममा भएको ज्यादती प्रकरणमा सिरहाका प्रहरी प्रमुख पण्डित हेडक्वाटर तानिए

सिरहा । सिरहाको औरही गाउँपालिका–५ मा महायज्ञको नाममा दीपक मल्लिकको घर भत्काइएको घटनामा प्रहरी प्रशासनको कमीकमजोरी देखिएको भन्दै सिरहाका प्रहरी प्रमुख रमेश पण्डितलाई हेडक्वाटर तानिएको छ।

प्रहरी प्रधान कार्यालयले पण्डितलाई काठमाडौंस्थित हेडक्वाटरमा तान्दै, उनको ठाउँमा प्रहरी उपरीक्षक (एसपी) अनन्तराज शर्मालाई सिरहाको नयाँ प्रहरी प्रमुखका रूपमा पठाएको गृह मन्त्रालय स्रोतले जनाएको छ।

उक्त घटनाका कारण स्थानीय प्रशासनको भूमिकाप्रति व्यापक आलोचना भएपछि यसअघि गत शुक्रबार सिरहाका तत्कालीन प्रमुख जिल्ला अधिकारी (सीडीओ) बासुदेव दाहाललाई पनि गृह मन्त्रालय तानिएको थियो।

औरही गाउँपालिकामा महायज्ञको नाममा दलित परिवारमाथि ज्यादती भएको घटनापछि स्थानीय प्रशासनको भूमिकालाई लिएर चर्को विरोध भएको थियो। मानव अधिकारकर्मी तथा विभिन्न संगठनहरूले घटनाको गम्भीर छानबिन गर्न माग गरेका छन्।