हावाहुरीले एकल महिलाको झुपडीको छाना उडाएपछि बिचल्ली

सिराहा, वैशाख २ गते । सोमबार राति आएको भीषण हावाहुरीले मिर्चैया नगरपालिका–१, महदेवास्थित सार्वजनिक पोखरीको डिलमा रहेको एक झुपडीको छाना उडाएपछि त्यहाँ बसोबास गर्दै आएकी एकल महिला फुदुरदेवी सदा बिचल्लीमा परेकी छन्। झुपडीको छाना उडेर घर खुलेको आकाशजस्तो भएपछि उनी छोरीसहित छिमेकीको घरमा शरण लिन बाध्य भएकी छन्।

झन्डै दुई वर्षअघि श्रीमान् मगनिया सदाको निधन भएपछि करिब ४३ वर्षीया फुदुरदेवी आफ्ना दुई छोराहरू विदेशिएका र छोरीसँग गाउँमै मजदुरी गर्दै गुजारा चलाइरहेकी थिइन्। अत्यन्तै विपन्न अवस्था र अभावमा बस्दै आएकी सदा परिवारले दुःखसुख गरेर बनाएको टिनको छानासमेत हावाहुरीले उडाएपछि अहिले खुला आकासमुनि जस्तै भएको छ।

वडासदस्य तथा मिर्चैया नगरपालिका न्यायिक समितिका सदस्य सञ्जय साहका अनुसार, “हावाहुरीले मानवीय क्षति त भएन, तर फुदुरदेवी सदा जस्तो एकल महिला, जसको सहारा घरको झुपडी थियो, त्यसको छाना उडाउँदा उनी अहिले निकै समस्यामा परेकी छन्।”

साहका अनुसार सदा अहिले छिमेकीको घरमा टेकेकी छन्। “छोराहरूले विदेशबाट पठाएको पैसा जम्मा गरेर बनाएको छाना हावाले उडाएपछि अब गर्मीमा कसरी बस्ने भन्ने चिन्ता थपिएको छ,” उनले भने।

फुदुरदेवीको घर मिर्चैयाको महदेवा गाउँको सार्वजनिक पोखरीको छेउमा रहेको कच्ची झुपडी हो। सार्वजनिक जमिन भएकाले घर बनाउन पनि सुरक्षित अवस्था छैन। श्रीमान् गुमाइसकेकी सदा घर–गाउँमा मजदुरी गरेर दुई छोरी र छोराहरूको पालनपोषण गर्दै आइरहेकी थिइन्।

उनी भन्छिन्, “छानामुनी भए पनि आफ्नै थलो थियो, अब त्यही पनि छैन। छोरीलाई लिएर कहाँ बस्ने, कसरी बस्ने भन्ने सोच्दा रातभर निद्रा लाग्दैन।”

स्थानीय सरकार र समाजसेवी संस्थाहरूले तत्काल राहत र आवासको व्यवस्था मिलाउने अपेक्षा गरिएको छ। स्थानीयहरूले सदा परिवारलाई तत्कालका लागि त्रिपाल र खाद्यान्न सामग्रीको व्यवस्था गरिदिन माग गरेका छन्।

गर्मी याम सुरु भइसकेको छ। खुलेको घरमा रहन सकिने अवस्था छैन। न त पर्याप्त आर्थिक स्रोत छ, न त सुरक्षित बसोबासको सुनिश्चितता।

स्थानीय वडाले राहतको प्रक्रिया अघि बढाउने तयारी गरिरहेको जानकारी दिएको छ। वडासदस्य साहले भने, “हामी नगरपालिकासँग समन्वय गरेर तत्कालीन राहत जुटाउने प्रयासमा छौं।”