लहानमा भव्य मोहम्मद डेको जुलुसको तयारी, झण्डा अनिवार्य, मोटरसाइकल र डिजे साउन्डमा रोक

फिरोज सिद्दिकी 

लहान । लहानमा यस वर्षको मोहम्मद डेको जुलुस आगामी भदौ २० गते शुक्रबार (जुमाको दिन) बिहान ८:३० बजे निकालिने भएको छ । जुलुस बाख्रा बजारबाट सुरु हुने जनाइएको हो।

यसका लागि बिहीबार बिहान युथ मुस्लिम वेलफेयर सोसाइटी नेपाल, लहान मुस्लिम समाज र विभिन्न मदरसाका प्रतिनिधिहरूबीच विशेष बैठक बसेको थियो । बैठकमा जुलुसलाई शान्तिपूर्ण, मर्यादित र व्यवस्थित बनाउन नियम बनाइएका छन् ।

बैठकले यसपटकको जुलुसलाई अझ अनुशासित बनाउन केही कडाइ गर्ने निर्णय गरेको छ । महिलाहरूलाई जुलुसमा सहभागी नगराइने, मोटरसाइकल लिएर आउन नपाइने, साउन्ड सिस्टम ठूलो स्वरमा बजाउन नपाइने नियम तोकिएको छ ।

त्यस्तै, हरेक सहभागीले आफ्नो घरबाट अनिवार्य रूपमा एउटा झण्डा बोकेर आउनुपर्ने व्यवस्था गरिएको छ । सुरक्षाको दृष्टिले प्रशासनलाई पत्र बुझाएर शान्ति–सुरक्षाको माग गर्ने निर्णय पनि भएको छ ।

युथ मुस्लिम वेलफेयर सोसाइटी नेपालका अध्यक्ष इसराइल सिद्दिकीले भने, सबै मिलेर नियम अनुसार अघि बढ्यौँ भने यो कार्यक्रम सफल मात्र होइन, उदाहरणीय पनि हुनेछ। उनले, अनुशासन र सहकार्यमा रहेर कार्यक्रमलाई सफल बनाउन सबैलाई आग्रह गरेका छन्।

लहानमा मोहम्मद डेको दिन विगतमा पनि भव्य जुलुस निकालिँदै आएको छ । टोल टोलका मुस्लिम समुदाय झण्डा बोकेर एकै ठाउँमा भेला हुने, मुस्लिम नारा लगाउने, नात पढ्ने र सामूहिक रूपमा जुलुसमा सहभागी हुने परम्परा रहिआएको छ । तर, कहिलेकाहीँ भीड व्यवस्थापनमा समस्या देखिने गरेको अनुभव छ ।

यसपटक आयोजकहरूले सुरुमै कडाइका नियम तोकेकाले विगतका कमजोरी दोहोरिन नदिने विश्वास लिइएको छ ।

लहानबासीले जुलुसलाई धार्मिक श्रद्धा मात्रै नभई भाईचार र ऐक्यबद्धताको प्रतीकका रूपमा लिने गरेका छन् । व्यापारी र स्थानीय निकायका प्रतिनिधिहरूले पनि मर्यादित ढंगले सम्पन्न गर्न सहयोग गर्ने जनाएका छन् ।

कार्यक्रमलाई शान्तिपूर्ण बनाउन सुरक्षा निकायसँग आधिकारिक पत्राचार गर्ने तयारी गरिएको छ । सहभागी मदरसाका प्रतिनिधिहरूले विद्यार्थी र श्रद्धालुहरूलाई अनुशासनमा रहि सहभागी गराउने प्रतिबद्धता जनाएका छन् ।

मुस्लिम समुदायका लागि मोहम्मद डेको दिन विशेष महत्व राख्छ । यस दिन निकालिने जुलुसले समाजमा शान्ति, भाईचार र सहअस्तित्वको सन्देश दिने आयोजकको अपेक्षा छ ।