शिक्षामन्त्री सस्मित पोखरेल सुरक्षाकर्मीको सहयोगमा बाहिरिए पाठ्यक्रमका लागि सुझाव लिन आयोजित कार्यक्रममै विवाद

सिरहा । विद्यार्थीको सिकाइ र शिक्षाको गुणस्तर सुधारका लागि पाठ्यक्रम निर्माण तथा परिमार्जनमा स्थानीय तह, शिक्षक र जनप्रतिनिधिको सुझाव लिन आयोजित कार्यक्रम नै विवादमा परिणत भएको छ ।

सिरहाको औरही गाउँपालिकाले आयोजना गरेको पाठ्यक्रमका लागि सुझाव संकलन कार्यक्रममा शिक्षा तथा खेलकुदमन्त्री सस्मित पोखरेल सहभागी भएका बेला जनप्रतिनिधिबीचको असन्तुष्टि र विवाद चर्किएको हो ।

कार्यक्रममा गाउँपालिका अध्यक्ष शिवजी यादवपछि पुगेका मन्त्री पोखरेललाई सम्बोधनका लागि सीधै माइक दिइएपछि जिल्ला समन्वय समिति सिरहाका सभापति दिनेश महतोले आपत्ति जनाएका थिए । कार्यक्रममा सहभागी अन्य शिक्षक तथा जनप्रतिनिधिले पनि आफूहरूलाई धारणा राख्ने पर्याप्त अवसर नदिइएको भन्दै असन्तुष्टि जनाएको महतोको दाबी छ ।

महतोका अनुसार पाठ्यक्रम निर्माणका लागि स्थानीय तहका जनप्रतिनिधि र शिक्षकको सुझाव लिन बोलाइएको कार्यक्रममा उनीहरूकै धारणा राख्ने अवसर सीमित गर्नु उचित थिएन ।

‘यो गुनासो मेरो मात्रै थिएन, त्यहाँ सहभागी शिक्षक र अन्य जनप्रतिनिधि साथीहरूको पनि थियो,’ महतोले भने, ‘तर मन्त्रीज्यूसँग आउनुभएका केही साथीहरूले अपमानजनक ढंगले चुप लगाउन खोज्नुभयो । जिल्लाका जनप्रतिनिधिको आवाज नसुन्ने हो भने यो कस्तो सुझाव संकलन हो ?’

विवादका क्रममा कार्यक्रमस्थलमा भिडियो खिचिरहेका राष्ट्रिय स्वतन्त्र पार्टीका औरही गाउँपालिका सभापति सन्तोष यादवको मोबाइल फोन खोस्न लगाइएको विषयले पनि स्थिति थप तनावपूर्ण बनेको थियो ।

महतोको दाबीअनुसार मन्त्रीसँगै आएका एक व्यक्तिले नेपाली सेनालाई निर्देशन दिँदै यादवको मोबाइल खोस्न लगाएका थिए । त्यसपछि कार्यक्रमस्थलमा होहल्ला भएको र वातावरण असहज बनेको उनको भनाइ छ ।

विवाद बढ्दै गएपछि मन्त्री पोखरेलले आफ्नो सम्बोधन छोट्याएका थिए । त्यसपछि सुरक्षाकर्मीको सहयोगमा उनी कार्यक्रमस्थलबाट बाहिरिएका थिए ।

तर, घटनाको जिम्मेवारीबारे भने सहभागी पक्षहरूबीच नै मतभेद देखिएको छ । राष्ट्रिय स्वतन्त्र पार्टीका सांसद शिव यादवले कार्यक्रम विवादित हुनुको मुख्य कारण जिल्ला समन्वय समिति सिरहाका सभापति दिनेश महतो नै रहेको आरोप लगाएका छन् ।

यसरी पाठ्यक्रम निर्माणका लागि स्थानीयस्तरबाट सुझाव संकलन गर्ने उद्देश्यले आयोजना गरिएको कार्यक्रम राजनीतिक तथा व्यवस्थापकीय विवादको केन्द्र बनेको छ ।

घटनाले एउटा गम्भीर प्रश्नसमेत उठाएको छ—शिक्षा नीति र पाठ्यक्रमजस्तो विषयमा शिक्षक, जनप्रतिनिधि तथा सरोकारवालाको सुझाव लिन आयोजना गरिएको कार्यक्रममा उनीहरूलाई आफ्नो धारणा राख्ने पर्याप्त वातावरण नै नबने त्यसबाट कस्तो सुझाव संकलन हुन्छ ?

यद्यपि, कार्यक्रममा वास्तवमा कसले के निर्देशन दिएको थियो, मोबाइल खोस्न लगाइएको हो वा होइन तथा विवादको तत्कालीन कारण के थियो भन्ने विषयमा सम्बन्धित सबै पक्षको स्पष्ट धारणा आउन बाँकी छ ।