शिक्षकले चाहे गुणस्तरीय शिक्षा सम्भव छ : प्रअ यादव

समृद्धिपथ समाचारदाता

लहान । सामुदायिक विद्यालयको साँख खस्कीरहेको अवस्थामा सिरहाको सखुवानन्कारकट्टी गाउँपालिका वडा नम्बर १ मौवाही स्थित रहेको श्री जनता नमूना माध्यमिक विद्यालय प्राविधिक धार आधुनिक प्रविधीमैत्री बन्दै गइरहेका छन् । विद्यालयमा बालबालिकाहरुलाई कम्प्यूटर, प्रोजेक्टरको माध्यमबाट अध्ययन अध्यापन गराउन थालिएको छ भने व्यवस्थापन पक्षले पठन पाठनलाई सि.सि.टि.भी. क्यामराबाट अनुगमन गर्ने गरेको छ ।

विद्यालयको प्रगति गर्नुमा प्रधानाध्यापक रामपृत यादवको भूमिका महत्पूर्ण रहेको स्थानीयहरले बताएका छन् । कुनैबेला खस्कँदो शैक्षिक स्तर र भताभुङ्ग व्यवस्थापनले विद्यालय बन्द हुने अवस्थामा पुगिसकेको थियो । तर जब उहाँ प्रअ बनेर विद्यालयमा आउनुभयो तब विस्तारै विद्यालयले सुधारको सुरुवात गर्नथाल्यो । कच्ची भवन, जिर्ण पूर्वाधार, डेस्कबेन्चको अभाव, दिगो आर्थिक स्रोतको अभाव र समुदायको पनि सकारात्मक धारणा नभएको अवस्था थियो, विद्यालय व्यवस्थापन समितिका अध्यक्ष रामबालक साहले विगतलाई सम्झदै बताउनु भयो । लथालिङ्ग र भताभुङ्ग स्थिति थियो । तर उहाँले हरेस खानु भएन । निरन्तर विद्यालय सुधार कसरी गर्न सकिन्छ भनेर लागिरहनु भयो । दत्तचित्त भएर विद्यालमा मात्रै केन्द्रीय हुनुभयो प्रअ यादव ।

२०६८ माघदेखि प्रअ भएर यादव आएदेखि विद्यालयको काया पलट भएको छ । प्रअ यादवकै मिहिनेत, असल नेतृत्व र सही व्यवस्थापनले विद्यालयको कायापलट सम्भव भयो भन्नुहुन्छ सहायक प्रअ पवन यादव । उहाँ विहानदेखि वेलुकासम्म विद्यालयको कार्यमा व्यस्त रहनुहुन्छ । विद्यालयमा बढी समय दिनु, सबैसँग समन्वय गर्नु, शिक्षक स्टापहरुसँग पनि राम्रोसँग घुलमिल हुनु नै रहेको छ ।

सिरहा जिल्लाकै दुर्गम ग्रामीण क्षेत्रमा रहेको यस विद्यालयमा प्राविधिकधारतर्फ सिभिल ईन्जिनियरिङ, डिपलोमा ४ वर्षे र ३ वर्षे कोर्षको कक्षा संचालन भइरहेको छ । तीन विगहा क्षेत्रफल रहेको प्राङ्गण, २५ कोठे पक्की भवन, विज्ञान प्रयोग शाला, शुद्ध खानेपानीको व्यवस्था, महिला मैत्री सौचालय, कम्प्यूटर ल्याव र सिसि टिभि क्यामरा लगायतका प्रविधियुक्त उपकरणले विद्यालयलाई नमूना विद्यालय बनाउन सफल भएको सखुवानन्कारकट्टी गाउँपालिकाका श्रोत व्यक्ति भोगेन्द्र यादवले बताउनु भयो ।

विद्यालयमा करिव ८ सय ४६ जना छात्र छात्राहरु पढिरहेका छन् । प्राविधिकधार तर्फ विभिन्न जिल्लाका ७८ जना विद्यार्थीहरु सिभिल ईन्जिनियरिङ पढदै आइरहेको विद्यालयका प्र.अ. यादवले जानकारी दिनुभयो ।

प्र.अ. यादवका अनुसार आज यहाँ जे जती शैक्षिक भौतिक र वातावरणीय व्यवस्थापन र सुधार छन् ती सबै यहाँका स्थानीय बासिन्दा र वि.व्य.स. सँग समन्वय गर्दै मेरै नेतृत्वमा यो विद्यालय नेपालको नमुना विद्यालयमा छनौटसम्म भएको छ । समय र चुनौतिको पहिचान गर्दै प्रविधि र व्यवसायिक शिक्षामा जोड दिइयो । विज्ञान प्रयोगशाला, कम्प्युटर ल्याव, इ–लाइव्रेरी, विद्युतीय हाजिरी, सिसी क्यामेराको जडान, इमेल इन्टरनेट सुविधाको विस्तारसंगै विद्यालयमा शैक्षिक, भौतिक, प्रशासनिक र आर्थिक क्षेत्रमा नै परिवर्तन भएको छ । तर यो परिवर्तन मेरो कारणले भन्दा पनि अभिभावकहरुको मानसिकतामा भएको परिवर्तन, शिक्षक साथीहरुमा आएको उत्सुकता, वि.व्य.समा देखिएको जागरुकता र स्थानीय तहको सहयोग सम्भव भएको छ ।

उहाँले विद्यालयको प्रगति देख्न नचाहनेहरुले विद्यालयमा राजनीतिक चलखेल गरेर विवाद सृजना गर्ने गरेको प्रति गुणसो पोख्नु भयो ।