विकासका पक्षमा मतदान गर्ने मतदाताको भनाई

फिरोज सिद्दिकी,

सिरहा । आगामी मङ्सिर ४ गते हुने प्रदेश तथा प्रतिनिधिसभा निर्वाचनमा सिरहाका ४ वटै निर्वाचन क्षेत्रका मतदाताहरु अधिकार भन्दा पनि विकासको पक्षमा रहेकोले सर्वपक्षिय इमान्दार विकास प्रेमी उम्मेदवारलाई मतदान गर्ने बताउन थालेका छन् ।

प्रदेश तथा प्रतिनिधिसभा निर्वाचनका लागि घरदैलो, चुनावी सभा, गोष्ठी, मतदातासंग प्रत्यक्ष भेटघाटमा व्यस्त रहेका उम्मेदवारहरुको चरित्र नियालिरहेको स्थानीय मतदाताहरु भन्न थालेका छन् ।

दलका नेता तथा कार्यकर्ताले पनि आ-आफ्ना पार्टीका घोषणापत्र लिएर घर घरमा गई आ-आफ्ना विकसका एजेन्डासहित भोट माग्नमा व्यस्त देखिन्छ । उनीहरुले विकासका मुद्दालाई पहिलो प्राथमिकतामा राखेर मतदातालाई आफ्नो पक्षमा पार्नका लागि घरदैलो अभियान महत्वका साथ गरिरहेका छन् ।

निर्वाचनाका मिति नजिकदै जाँदा सत्ता गठबन्धन र एमाले जसपा गठबन्धन बीच कडा प्रतिस्पर्धाहुने देखिएको छ । सिरहा क्षेत्र नं. १ मा प्रतिनिधि सभाका लागि नेपाली कांग्रेसका पद्म नारायण चौधरी र नेकपा एमालेका रामशंकर यादव बीच कडा प्रतिस्पर्धा हुने देखिएको छ ।

त्यस्तै क्षेत्र २ मा सत्ता गठबन्धनकाबाट उम्मेदवार बन्नु भएका नेपाली कांग्रेसकी नेतृ पूर्व मन्त्रि चित्रलेखा यादव र एमाले जसपा गठबन्धनका उम्मेदवार पूर्व मन्त्री राजकिशोर यादव बीच कडा प्रतिसपर्धा हुने मतदाताहरु बताउँछन् ।

त्यसैगरी क्षेत्र नम्बर ३ मा पनि दुई पूर्व मन्त्रिबीच प्रतिस्पर्धा कडा नै हुने स्थानीय मतदाताहरु बताउँछन् । एमाले जसपा गठबन्धनबाट एमालेका उम्मेदवार लिलानाथ श्रेष्ठ र सत्ता गठबन्धनबाट नेकपा माओवादीका उम्मेदवार विश्वनाथ साह बीच प्रतिष्पर्धा हुने बताइन्छ ।

त्यस्तै हाइप्रोफाईलका नेताहरु पनि स्वतन्त्र उम्मेदवार बनेका छन् । उनीहरु पनि आफू जित्ने दावी गरिरहेका छन् ।

निर्वाचनको मिति नजिकिएसँगै जिल्लाका सुरक्षा व्यवस्थालाई समेत कडा पारिएको छ । सुरक्षाको दृष्टिकोणले अति संवेदनशील, संवेदनशील र सामान्य गरी तीन तहमा मतदानस्थललाई विभाजन गरी सोहीअनुसार सुरक्षा निकायलाई परिचालन गरिएकाले ढुक्कसँग मतदान गर्न सिरहाका प्रमुख जिल्ला अधिकारी लालबाबु कवाडीले सबै मतदातामा आग्रह गर्नु भएको छ ।