‘अखण्ड भारत’को नक्सामा नेपाली भूभाग समेटिएको प्रति एमालेका वरिष्ठ उपाध्यक्ष पोखरेलको आपत्ति

फिरोज सिद्दिकी,

लहान । नेकपा एमालेका वरिष्ठ उपाध्यक्ष ईश्वर पोखरेलले भारतको नवनिर्मित संसद भवनमा राखिएको ‘अखण्ड भारत’को नक्सामा नेपालको लुम्बिनी र कपिलवस्तु समेत समावेश गरिएको प्रति आपत्ति जनाएको छ । सिरहाको सखुवानन्कारकट्टी-३ मा नेकपा एमाले जिल्ला कमिटि सिरहाले आयोजना गरेको पार्टी प्रवेश कार्यक्रममा यस्तो बताउनु भएको हो ।

भारतले हालै उद्घाटन गरेको नयाँ संसद भवनमा राखिएको उक्त नक्सामा विश्वमै प्रख्यात नेपालको रुपन्देही जिल्लामा पर्ने बुद्ध जन्मस्थल लुम्बिनी र अर्को नेपालको भू-भाग कपिलवस्तुलाई पनि समावेश गरिएको सार्वजनिक हुनु निकै नै आपत्तिजनक रहेको बताउनु भयो ।

उहाँले यस विषयमा आजै भारत भ्रमणमा गएका प्रधानमन्त्री पुष्पकमल दहाल प्रचण्डले गम्भिरतापूर्वक कुरा उठाउनु पर्ने धारणा राख्दै यसबारे सरकारको धारणा यथाशीघ्र सार्वजनिक गर्न माग समेत गर्नु भयो ।

नेपालको कालापानी, लिम्पियाधुरा र लिपुलेकसहितको भू-भागको सम्वन्धमा पनि प्रधानमन्त्री प्रचण्डले भारतसंग कुरा गर्नु पर्ने बताउनु भयो ।

भारतले नेपालको भू-भागलाई आफ्नो नक्सामा राखेर छिमेकी मित्रराष्ट्रहरुप्रति देखाएको हेपाहा प्रवृत्तिप्रति आपत्ति जनाउदै यसबाट दुई देशबीच थप समस्या सिर्जना हुने बताउनु भयो ।

भारतमा आइतवार उद्घाटन भएको नयाँ संसद् भवनमा ‘अखण्ड भारत’ को नक्सा भित्तामा अङ्कित गरिएको छ । नक्सामा ‘अखण्ड भारत’ भन्दै नेपालको लुम्बिनी, कपिलवस्तुदेखि पाकिस्तानको तक्षशिलासम्मको क्षेत्रलाई समेटिएको छ ।