रोकिएका विकास योजनाहरू सुचारु गर्न माग गर्दै वडा कार्यालयमा ज्ञापनपत्र

फिरोज सिद्दिकी

लहान । लहान नगरपालिका वडा नं. ५ का वडाध्यक्ष अब्दुल करिमलाई नेकपा एमाले वडा कमिटीले वडा विकास योजनामा ढिलाइ र वेवास्ता भएको भन्दै ७ बुँदे ज्ञापनपत्र बुझाएको छ।

लहान ५ वडा कमिटीका अध्यक्ष लक्ष्मी पासमानको नेतृत्वमा बुझाइएको ज्ञापनपत्रमा नगरपालिकाले विगतमा सञ्चालित नगर तथा वडास्तरीय गौरवका योजनाहरूमा कुनै पहल नगरेको आरोप लगाइएको हो।

ज्ञापनपत्रमा वडा नं. ५ मा असुली गरिएका कर, सडक बत्ति शुल्क र वातावरण शुल्कको औचित्यप्रति प्रश्न उठाइएको छ, किनकि महिनौंसम्म फोहर उठाउने काम नभएको र सडक बत्तिको उचित व्यवस्थापन नभएको उल्लेख छ। पार्टीले चाडपर्वको समयमा पनि वडामा आधारभूत सुविधाको अभाव रहेकोप्रति गम्भीर ध्यानाकर्षण गराएको छ।

सचेत गराउँदै आन्दोलनको चेतावनी
नेकपा (एमाले) लहान वडा नं. ५ का अध्यक्ष लक्ष्मी पासमानले विकास निर्माण र सार्वजनिक सेवामा भइरहेको ढिलासुस्ती र लापरवाहीले जनताको जनजीविकामा नकारात्मक असर परेको बताएका छन्। ज्ञापनपत्रमा, समयमै मागहरू पूरा नगरेमा चरणबद्ध आन्दोलन गर्ने चेतावनी दिइएको छ।

नेकपा एमालेले यस्ता समस्याहरू समाधानका लागि नगरपालिका र वडा अध्यक्षसँग तत्काल पहल गर्न आग्रह गरेको छ। पार्टीले जनताको आधारभूत आवश्यकतामा नगरपालिकाले ध्यान नदिए, चरणबद्ध आन्दोलन गर्ने चेतावनी दिएको छ। “समस्याहरू समाधान नभए आन्दोलनको जिम्मेवारी वडा अध्यक्ष र नगरपालिकाले लिनुपर्नेछ,“ लक्ष्मी पासमानले बताएका छन्।

वडाका जनताको विकास र सुविधामा प्रत्यक्ष असर
ज्ञापनपत्रमा जनजीविका, स्वास्थ्य र वातावरण जस्ता महत्वपूणर् पक्षमा नगरपालिकाले आवश्यक जिम्मेवारी नलिएकोप्रति रोष प्रकट गरिएको छ। पार्टीले भनेको छ, “विकासका अधुरा योजनाहरू र आधारभूत सेवामा भइरहेको लापरवाहीले वडा नं. ५ का जनताको जीवनमा प्रत्यक्ष असर परेको छ।”

प्रमुख मागहरूः
१. होम्योप्याथिक अस्पतालको तत्काल सञ्चालन।
२. झण्डा पार्कलाई पुनः व्यवस्थित गर्नुपर्ने।
३. सडक बत्ति र सरसफाइ नियमित गरिनुपर्ने।
४. अधुरो स्वास्थ्य चौकीको निर्माण कार्य सम्पन्न गरिनुपर्ने।
५. बाँकी रहेका सडक र गल्लीहरूको स्तरउन्नति गर्नुको साथै भत्किएका सडक र नालाहरूको मर्मत गरिनुपर्ने।
६. रोकिएको नयाँ बजार र झोलुङ्गे पुलको निर्माण कार्य सुचारु गर्नुपर्ने।
७. कन्या विद्यालयको अधुरो निर्माण कार्य तत्काल सुरु गरिनुपर्ने।