अनेरास्ववियू (क्रान्तिकारी) द्वारा इजरायली आक्रमणको विरोध, नेपालीको सुरक्षाका लागि सरकारलाई पहल गर्न आग्रह

काठमाडौँ । अनेरास्ववियू (क्रान्तिकारी) ले लेबनान र प्यालेस्टाइनमाथि भइरहेको बर्बरतापूर्ण आक्रमण रोक्न माग गर्दै प्रदर्शन गरेको छ। बिहीबार काठमाडौंको माइतीघर मण्डलामा भएको प्रदर्शनमा संगठनले इजरायली आक्रमणको विरोध गर्दै लेबनान र प्यालेस्टाइनका जनताप्रति समर्थन र सहानुभूति प्रकट गरेको हो।

विद्यार्थी संगठनले इजरायली आक्रमणका कारण लेबनान र प्यालेस्टाइनका जनताले भोगिरहेको दुःखदायी परिस्थितिप्रति गहिरो चिन्ता व्यक्त गरेको छ। साथै, इजरायल र लेबनानमा रहेका नेपालीहरूलाई सुरक्षित रूपमा स्वदेश फर्काउन नेपाल सरकारलाई पहल गर्न आह्वान गरेको छ।

अनेरास्ववियू (क्रान्तिकारी) ले हमासको कब्जामा रहेको भनिएका नेपाली विद्यार्थी विपिन जोशीको रिहाइका लागि पनि इजरायली दूतावास, नेपाल सरकार र अन्तर्राष्ट्रिय समुदायलाई पहल गर्न आग्रह गरेको छ। संगठनले विद्यमान संकटलाई चाँडो समाधान गर्न अन्तर्राष्ट्रिय जगतले पनि ध्यान दिनुपर्नेमा जोड दिएको छ।

प्रदर्शनमा सहभागी विद्यार्थीहरूले इजरायली आक्रमणको विरोधमा नारा लगाएका थिए र नेपाल सरकारलाई नेपालीहरूको सुरक्षाको प्रत्याभूति गर्न आवश्यक कदम चाल्न माग गरेका थिए।