नेपाल बुद्धिजीवी परिषद् सिरहाको सातौं जिल्ला अधिवेशन सम्पन्न, भैरव गेलाल पुनः अध्यक्ष चयन

फिरोज सिद्दिकी 

सिराहा । नेपाल बुद्धिजीवी परिषद् सिरहाको सातौं जिल्ला अधिवेशन शनिबार सिराहाको लाहानमा सम्पन्न भएको छ। अधिवेशनले भैरव गेलाललाई पुनः सर्वसम्मत रूपमा दोस्रो कार्यकालका लागि अध्यक्ष चयन गरेको हो।  

नवगठित कार्यसमितिमा उपाध्यक्षमा रामबाबु यादव, सचिवमा भानुभक्त गौतम, सह-सचिवमा प्रेम लामा र हेमशंकर यादव तथा कोषाध्यक्षमा ध्यानी मण्डल चयन भएका छन्। यस्तै, सदस्यहरूमा यमुना खनाल, रामकुमार साह, राम बिलक्षण सिंह, धीरज कुमार साह, सूर्यनारायण यादव, सुशीला महतो, राजन प्रसाद लुइटेल, बाबुलाल मण्डललगायतका रहेका छन्।  

वर्तमान सरकारमाथि चौतर्फी हमला भइरहेको छ – लीलानाथ श्रेष्ठ

कार्यक्रमका विशिष्ट अतिथि नेकपा एमाले स्थायी कमिटी सदस्य, प्रतिनिधि सभा सदस्य तथा मधेस प्रदेशका इन्चार्ज लीलानाथ श्रेष्ठले सरकारको वर्तमान अवस्थाबारे धारणा राख्दै सरकारमाथि मुलुकभित्र र बाहिरबाट चौतर्फी हमला भइरहेको बताए। उनले एमाले सरकारद्वारा ल्याइएका अध्यादेशहरू जनहितमा रहेको जिकिर गर्दै प्रतिपक्षी दलहरूले अनावश्यक अवरोध सिर्जना गरिरहेको आरोप लगाए।  

श्रेष्ठले सुकुम्बासी समस्या समाधान गर्ने पहलको विपक्षमा प्रतिपक्ष उभिएको दाबी गर्दै विगतका सरकारहरूले पनि अध्यादेशमार्फत शासन गरेको स्मरण गराए। साथै, उनले नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’लाई लक्षित गर्दै राजावादी र पहिचानवादीहरूसँग मोर्चाबन्दी गरेर कुन व्यवस्था ल्याउन खोजिएको हो भन्ने प्रश्न उठाए।  

कार्यक्रमका प्रमुख अतिथि नेपाल बुद्धिजीवी परिषद्का केन्द्रीय उपाध्यक्ष डा. कामानन्द देवले परिषद्को महत्त्वबारे प्रकाश पार्दै सिरहामा परिषद्ले गरेको कार्यको प्रशंसा गरे। उनले आर्थिक क्षेत्रलाई मजबुत बनाउन सरकारले ल्याएका विधेयकहरू महत्त्वपूर्ण रहेको बताए।  

नेपाल बुद्धिजीवी परिषद् सिरहाका अध्यक्ष भैरव गेलालको अध्यक्षतामा सम्पन्न उक्त कार्यक्रममा नेकपा एमालेका केन्द्रीय सदस्य तथा सिरहा जिल्ला इन्चार्ज गङ्गाप्रसाद यादव, सिरहा क्षेत्र नं १ का प्रतिनिधि सभा सदस्य रामशंकर यादव, नेकपा एमाले सिरहाका कार्यबाहक अध्यक्ष तथा सिरहा नगर प्रमुख डा. नवीन यादव, धनगढीमाई नगर प्रमुख शिवशंकर महतो, नेकपा एमाले केन्द्रीय सदस्य रामप्रित राम, नेपाल बुद्धिजीवी परिषद्का केन्द्रीय सदस्य राजकुमार मल्ल, पाविना सिंहलगायतका अतिथिहरूको उपस्थिति रहेको थियो।  

कार्यक्रममा २०० भन्दा बढी बुद्धिजीवी, पार्टी कार्यकर्ता तथा स्थानीय नागरिकहरूको सहभागिता रहेको थियो। अधिवेशनले परिषद्को भूमिकालाई थप प्रभावकारी बनाउने प्रतिबद्धता व्यक्त गर्दै समापन भएको थियो।