सिरहाको अर्नमा–१ मा युवकको हत्या, घर अगाडि शव फेला

१४ असार, सिराहा । सिरहाको अर्नमा गाउँपालिका–१ मा एक युवकको हत्या गरिएको अवस्थामा शव फेला परेको छ। स्थानीय रामसेवक महराका ३० वर्षीय छोरा अजय महरा शनिबार बिहान आफ्नै घर अगाडि मृत भेटिएको हो।

प्राथमिक अनुसन्धान अनुसार अजयलाई कुटपिट गरी घिसारिएको र त्यसपछि घाँटीमा लुगा बेरिएको अवस्थामा मृत फेला परेका स्थानीयले बताएका छन्। शवको अवस्था हेर्दा उनको हत्या योजनाबद्ध रुपमा गरिएको हुन सक्ने आशंका गरिएको छ।

घटनास्थलमा स्थानीयको ठूलो भिड लागेको छ भने सूचना प्राप्त भएपछि जिल्ला प्रहरी कार्यालय सिरहाबाट प्रहरीको टोली पुगेको छ। घटनाबारे अनुसन्धान भइरहेको जिल्ला प्रहरी कार्यालय सिरहाका प्रवक्ता डिएसपी बिरेन्द्र पासवानले जानकारी दिएका छन्।

डिएसपी पासवानका अनुसार, घटनाको प्रकृति हेर्दा यसमा हिंसात्मक हमला भएको देखिन्छ। "शवको मुचुल्का उठाएर पोस्टमार्टमका लागि पठाइएको छ। हत्याको कारण र दोषीको खोजीका लागि अनुसन्धान अघि बढाइएको छ," उनले बताए।

युवकको निर्मम हत्या पछि स्थानीय बासिन्दाहरू त्रसित र आक्रोशित बनेका छन्। घटनाको विस्तृत विवरण आउन बाँकी रहेको प्रहरीको भनाइ छ।