जेन्जी सहिद परिवारले तीन मन्त्रालयमा नियुक्ति माग गर्दै सरकारलाई चेतावनी

काठमाडौं । जेन्जी सहिद परिवार संघर्ष समितिले सरकारले सहिद परिवारप्रति बेवास्ता गरेको भन्दै तीन मन्त्रालयमा आफ्ना प्रतिनिधि नियुक्त गर्न माग गरेको छ। बिहीबार राजधानीको संवाद डबलीमा आयोजित पत्रकार सम्मेलनमा समितिले चेतावनीसहित सरकार समक्ष आफ्नो माग राखेको हो।

समितिले श्रम तथा रोजगार मन्त्रालयमा सहिद विजय चौधरीका दाजु दीपक चौधरी, खानेपानी मन्त्रालयमा सहिद इस्वत अधिकारीका आफन्त भोज विक्रम थापा, र युवा तथा खेलकुद मन्त्रालयमा सहिद योगेन्द्र न्यौपानेका मामा कमल सुवेदीको नाम सिफारिस गरेको जानकारी गराएको छ। 

समितिले ७ दिनभित्र माग सम्बोधन नगरे सशक्त आन्दोलन गर्ने चेतावनी दिएको छ। सहिद श्रीयाम चौलागाईका बुबा गणेश चौलागाई र कमल सुवेदीले सरकार र जेन्जीहरूले आफ्नो प्राथमिकतामा राख्नु पर्नेमा बेवास्ता गरेको भन्दै आक्रोश व्यक्त गरेका छन्।

सुवेदीले भने, “हामीले हाम्रा परिवारका सदस्य गुमाएका छौं, त्यसैमा टेकेर वर्तमान सरकार बनेको छ। जेन्जीहरू आआफ्नो स्वार्थमा लिप्त छन्।”