मुख्यमन्त्री सतिशकुमार सिंहको राजीनामा स्वीकृत, नयाँ सरकार गठनका लागि आह्वान

जनकपुरधाम । मधेस प्रदेशका मुख्यमन्त्री सतिशकुमार सिंहको राजीनामा प्रदेश प्रमुख सुमित्रा सुवेदी भण्डारीले स्वीकृत गरेकी छिन्। सिंहले मंगलबार मधेस प्रदेशसभाको बैठकमै रोष्टमबाट विश्वासको मत सामना नगरी राजीनामा घोषणा गरेका थिए।

प्रदेश प्रमुखको कार्यालयले आज (मंगलबार) सार्वजनिक गरेको विज्ञप्ति अनुसार सिंहको राजीनामा नेपालको संविधानको धारा १६९ उपधारा (१) को खण्ड (क) बमोजिम स्वीकृत गरिएको हो।

विज्ञप्तिमा भनिएको छ, “नेपालको संविधानको धारा १६८ को उपधारा (२) बमोजिम प्रदेशसभामा प्रतिनिधित्व गर्ने दुई वा दुई भन्दा बढी दलहरूको समर्थनमा बहुमत प्राप्त गर्न सक्ने प्रदेशसभा सदस्यलाई मिति २०८२ साल असोज २९ गते बुधबार दिउँसो ४ बजेभित्र मुख्यमन्त्री पदमा नियुक्तिका लागि आफ्नो दाबी पेश गर्न आह्वान गरिएको छ।”

यससँगै मधेस प्रदेशमा नयाँ सरकार गठनको प्रक्रिया औपचारिक रूपमा सुरु भएको छ। अब विभिन्न दलहरूबीच सत्ता साझेदारी र गठबन्धनबारे छलफल तीव्र हुने संकेत देखिएको छ।

स्मरण रहोस्, जनमत पार्टीका तर्फबाट मुख्यमन्त्री बनेका सतिशकुमार सिंह पछिल्ला दिनमा बहुमत जुटाउन असफल भएका थिए। राजीनामासँगै प्रदेशको राजनीतिक समीकरण फेरबदल हुने निश्चित देखिएको छ।