लहानमा क्षतिग्रस्त सरकारी कार्यालयको अनुगमन तत्काल सेवा सुचारु गर्न नगरपालिकाको सहयोग प्रतिबद्धता

लहान । जेन–जी आन्दोलनका क्रममा लहानमा तोडफोड, आगजनी र लुटपाटका कारण क्षतिग्रस्त सरकारी कार्यालयहरूको लहान नगरपालिकाले स्थलगत अनुगमन गरेको छ। नगर प्रमुख महेशप्रसाद चौधरीको नेतृत्वमा गरिएको अनुगमनपछि नगरपालिकाले जनतालाई सेवा प्रवाह गर्नका लागि तत्काल आवश्यक फर्निचर, कम्प्युटर, प्रिन्टरलगायतका विद्युतीय सामग्री सहयोग गर्ने प्रतिबद्धता जनाएको हो।

अनुगमन टोलीमा इलाका प्रशासन कार्यालयका प्रमुख उपसचिव वेदनिधि खनाल, लहान प्रहरी प्रमुख प्रहरी नायव उपरीक्षक कैलाश राई, संचारकर्मीलगायतको सहभागिता रहेको थियो। टोलीले घरेलु तथा साना उद्योग कार्यालय, डिभिजन वन कार्यालय, आन्तरिक राजश्व कार्यालय, नापी कार्यालय, खाद्य व्यवस्था तथा व्यापार कम्पनी र जिल्ला ट्राफिक प्रहरी कार्यालयको अवस्था निरीक्षण गरेको हो।

अनुगमनका क्रममा सम्बन्धित कार्यालय प्रमुखहरूले आन्दोलनका कारण भौतिक पूर्वाधार, विद्युतीय उपकरण, फर्निचर, र अन्य कार्यालय सामग्री गरी करिब २१ करोड तीन लाख ६० हजार ५४९ रुपैयाँबराबरको क्षति भएको जानकारी दिएका छन्।

लहान–८ स्थित आन्तरिक राजश्व कार्यालयमा भएको आगजनीमा सम्पूर्ण सामग्री र सवारीसाधन जलेर करिब साढे पाँच करोड रुपैयाँ बराबरको क्षति पुगेको प्रमुख भीम काफ्लेले जानकारी दिए। उनका अनुसार, “कार्यालय तत्काल मर्मत गरेर सञ्चालन गर्न नसक्ने अवस्थामा पुगेको छ, त्यसैले हाल राजश्वका कर्मचारीहरूको आवासबाट अस्थायी रूपमा सेवा दिइरहेका छौं।” उनले नगरपालिकाले नयाँ भवन उपलब्ध गराए सेवा संचालन सहज हुने बताए।

यातायात व्यवस्था कार्यालयका प्रमुख वीरेन्द्र साहका अनुसार, आन्दोलनपछि सवारीसाधन र चालक अनुमतिपत्र नवीकरण, सवारी जाँचपास, रुट इजाजतजस्ता सेवा सुचारु गर्न समस्या भइरहेको छ। उनले कम्प्युटर, प्रिन्टर, र फर्निचरको अभावका कारण कार्य अवरुद्ध भएको जनाउँदै नगरपालिकाबाट तत्काल सहयोगको अपेक्षा गरेका छन्।

सूचना अधिकारी विनित झाले आन्दोलनमा नयाँ–पुराना गरी करिब १५ हजार सवारी चालक अनुमतिपत्र, २७ थान कम्प्युटर, सात थान ल्यापटप लुटपाट भएको र १० हजार थान इम्बोस्ड नम्बर प्लेट जलेर नष्ट भएको जानकारी दिएका छन्।

डिभिजन वन कार्यालयमा करिब ९५ लाख रुपैयाँ बराबरको क्षति पुगेको वन अधिकृत शैलेन्द्रकुमार मिश्रले बताएका छन्। उनका अनुसार लेखा शाखाको कम्प्युटर, प्रिन्टर, एक स्कुटर, सात मोटरसाइकल, एक चारपांग्रे भ्यान र भवनमा क्षति पुगेको हो।

घरेलु तथा साना उद्योग कार्यालयमा दुई वटा स्टोर, सात थान कम्प्युटर र कार्यालय भवनमा आगजनी भए पनि माथिल्लो तल्लाबाट सेवा सुचारु गरिएको प्रमुख किशोरीशरण यादवले जानकारी दिए।

खाद्य व्यवस्था तथा व्यापार कम्पनीमा चार वटा गोदाममा भण्डारण गरिएको आठ हजार १४८ क्विन्टल चामल, तीन हजार २२० क्विन्टल चिनी, ५३ क्विन्टल २१ किलो धान र ९८ हजार ८१५ थान जुटका बोरा लुटपाट भएको प्रमुख दीपक सुनारले बताए। उनका अनुसार करिब १० करोड ९१ लाख २२ हजार ८२७ रुपैयाँ बराबरको क्षति भएको छ। नगरपालिकाले कार्यालय संचालनका लागि तत्काल एक–एक थान कम्प्युटर, प्रिन्टर, १०–१० वटा प्लास्टिक कुर्सी र टेबल हस्तान्तरण गरेको उनले जानकारी दिए।

इलाका प्रशासन कार्यालयमा करिब १५ लाख रुपैयाँ बराबरको क्षति भएको छ। प्रमुख वेदनिधि खनालका अनुसार कार्यालय मर्मत र रंगरोगनपछि सेवा पुनः सुचारु गरिएको छ।

लहान–१ स्थित जिल्ला ट्राफिक प्रहरी कार्यालयमा आन्दोलनका क्रममा करिब एक करोड रुपैयाँ बराबरको क्षति पुगेको ट्राफिक प्रहरी निरीक्षक सालिकराम तिमिल्सिनाले बताए। उनका अनुसार, सडक निगरानीका लागि जडान गरिएका चार थान शक्तिशाली सिसिटिभी क्यामेरा, कम्प्युटर, ल्यापटप र फर्निचर लुटपाट तथा आगजनीमा नष्ट भएका छन्।

नगर प्रमुख चौधरीले अनुगमनपछि भने, “विषयगत मन्त्रालय मातहतका कार्यालयमा विभागीय सहयोग ढिलो हुन सक्छ, त्यसैले जनतालाई सेवा लिन कठिनाई नहोस् भनेर नगरपालिकाले तत्कालका लागि आवश्यक सामग्री सहयोग गर्नेछ।”

गत २४ भदौमा भएको जेन–जी आन्दोलनका क्रममा सिरहा जिल्लाका १७ वटै स्थानीय तहमा निजी, प्रहरीसहित ५२ वटा संरचनामा तोडफोड र आगजनी भएका थिए। नगरपालिकाको भनाइमा क्षतिग्रस्त कार्यालयहरूलाई क्रमशः पुनःस्थापित गर्दै जनतामुखी सेवा पुनः सञ्चालन गर्न पहल जारी रहनेछ।