इभी हाइस गाडीमा आगजनी, लहानका मेयर र प्रहरी प्रशासनप्रति कडा आपत्ति

फिरोज सिद्दिकी

लहान । लहान नगरपालिका–२ निवासी नेकपा एमाले लहान नगर कमिटी सदस्य तथा ११औँ महाधिवेशन सिराहा क्षेत्र नं. १ का युवा प्रतिनिधि जितेन्द्र यादवको इलेक्ट्रिक भ्यान (EV) हाइस गाडीमा अज्ञात समूहले आगजनी गरेको छ। घटना सोमबार राति करिब ११:१५ बजे भएको हो।

पार्किङ गरिएको अवस्थामा रहेको गाडीमा आगजनी भएपछि नियन्त्रणका लागि लहान नगरपालिकामा पटक–पटक आग्रह गरिए पनि नगरपालिकाले आगो निभाउने गाडी नपठाएको एमालेले आरोप लगाएको छ। पछि गाेलबजारबाट दमकल आएर आगो नियन्त्रणमा लिइएको थियो।

घटनास्थल नजिकै रहेको प्रहरी कार्यालयबाट भने करिब पाँच मिनेटको दूरी हुँदा पनि प्रहरी आधा घण्टा ढिलोगरी पुगेको भन्दै एमाले लहानले यसलाई ‘गैरजिम्मेवारीपनको पराकाष्ठा’ भनेको छ।

एमाले लहान नगर कमिटीका अध्यक्ष राजकुमार साहद्वारा जारी विज्ञप्तिमा मेयर महेशप्रसाद चौधरी तथा लहान प्रहरी प्रशासनले नागरिकको ज्यानधनको सुरक्षाप्रति उदासीनता देखाएको भन्दै कडा भर्त्सना गरिएको छ। साथै आगजनीमा संलग्न दोषीलाई तत्काल पत्ता लगाई कानुन बमोजिम कारबाही गर्न, पिडितलाई क्षतिपूर्ति उपलब्ध गराउन सम्बन्धित निकायसँग जोडदार माग गरिएको छ।

घटनाको थप अनुसन्धान भइरहेको प्रहरीले जनाएको छ।